اسلام آباد۔ 14 جنوری (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ پاکستان تینا مارکیٹ ءِ چینی کیپٹل مارکیٹ تون پین ہم گرنچ کننگ کن جون اسکان پانڈا جاری کننگ نا خواہندارءِ، پاکستان اٹ چینی کمپنی تا رکھ اکن سیکورٹی ٹی ودکی کننگک، پاکستان اٹی سیکورٹی نا حالیت آک گچین مسنو۔ چین نا ساؤتھ چائنا مارننگ پوسٹ ءِانٹرویو ٹی وزیر خزانہ پارے کہ پاکستان چینی زرکارآتیان 200 آن 250 ملین ڈالر یکجا کننگ نا خواہندار ءِ، مصر انا وڑآ یوآن بانڈز آتا جاری کننگ نا بنک گارنٹی کن ایشین انفراسٹرکچر انویسٹمنٹ بینک تون گپ وتران چلینگ انگ ءِ۔ اوپارے کہ پاکستان بروک آ تُوتیٹی تینا کریڈٹ ریٹنگ ءِ سنگل بی ٹی بدل کننگ کن سنبرینگوک ءِ۔ وزیرخزانہ پارے کہ پاکستان نا زرگزرانی سوگوی کن چینی زرکاری بھاز اہم ءِ۔ چین پاکستان اقتصادی راہداری ءِ ملکی زرگزران کن اہم گوندسا وزیرخزانہ پارے کہ پاکستان سی پیک نا بروک آ فیز اٹی چین آن پین کمکاری نا خواہندار ءِ، سی پیک نابروک آ فیز اٹی خصوصی اقتصادی زون، کشت وکشار وانفارمیشن ٹیکنالوجی بشخ آتیٹی ودکی اتنگک۔ اوپارے کہ چین نا نجی بشخ و برآمدی صنعت آک پاکستان اٹی بایدے زرکاری کیر ، چین نا بھلا کمپنیک تینا برآمدی یونٹ آتے پاکستان آ گدریفسا پاکستان ءِ بطور برآمدی مرکز کاریم اٹ اتنگ کیرہ، سی پیک ٹواٹی برآمدی صنعت آتا اولیت آن وام ادائیگی ءِ آسان کننگک۔ اوپارے کہ درآمد آتیا استوار زرگزران نا سوب پاکستان ءِ زرمبادلہ نا کمتی و ادائیگی تیٹی بے بریبری مون تروک ءِ۔ اوپارے کہ پاکستان اٹی چینی کمپنی تا رکھ اکن سیکورٹی ٹی ودکی کننگک، پاکستان اٹ سیکورٹی نا حالیت آک گچین مسنو، جہانی کانفرنس آ ک مننگ ءُ، درملکی ڈل آک بننگ ءُ، درملکی کمپنی و زرکارآتا رکھ ءِ پک کننگ حکومت پاکستان نا اولیت ءِ، پاکستان چین اتون اوار اوار چینی ڈیہہ ہانگ کانگ تون کاروباری شریدار و ہانگ کانگ سٹاک اٹی پاکستانی کمپنی نا شریدار نا خواہندار ءِ، کاروباری شریدار آتیکن ہانگ کانگ نا زرکار آتا پاکستان نا دورہ کن ہانگ کانگ ناچیف ایگزیکٹیو جان لی کا چیو تون ہیت مسنے، تین پہ تینی شریدار آن ہڑتوم آ کنڈآتا واپار و زرکاری ءِ مون آ دننگ مریک۔ اوپارے کہ پاکستانی کمپنی و بینک آک روایتی وڑاٹ ملک آن پیشن لندن اسٹاک ایکسچینج اٹی لسٹنگ کرینے، پاکستانی کمپنی و بینک آک جہانی کہول آ کیپٹل یکجا کننگ کن ہانگ کانگ نا شہرت آن فائدہ ہرفر۔
