بنجائی وزیر تعلیم و کسبی تربیت خالد مقبول صدیقی تون ناروے نا مسکوہی وزیراعظم نا کماشی ٹی ڈل انا اوڑدہی

اسلام آباد۔ 13 جنوری (اے پی پی) بنجائی وزیر تعلیم و کسبی تربیت خالد مقبول صدیقی تون دوشنبے نادے آ ناروے نا مسکوہی وزیر اعظم کیل میگنے بونڈیوک نا کماشی ٹی اسہ بڑزکو واکداری ڈل اس اوڑدہی کرے۔ بنجائی سیکرٹری تعلیم محی الدین احمد وانی و مسکوہی باسک اوسلو پارلیمنٹ ناروے عامر جاوید شیخ ئسک ہم ساڑی ئسر۔ ڈاکٹر خالد مقبول صدیقی ناروے نا مسکوہی وزیراعظم کیل میگنے بونڈیوک ءِ بخیرکرے۔ اوپارے کہ کیل میگنے بونڈیوک پاکستان نا سنگت ءِ ہرامدام پاکستان نا چیلنج آتون مون تننگ اٹ کمک کرینے۔ ڈاکٹر خالد مقبول صدیقی پارے کہ اونا ساڑی گری مسن تا تعلیم آ جہانی کانفرنس نا ایجنڈا ءِ جہانی جوڑ کرے۔ بنجائی وزیرپارے کہ پاکستان مسن تا تعلیم و اسکول آن پیشن چناتا ویل آتون مون تننگ کن اسلامی ملک آتا کماشی ءِ کننگ ءِ۔ بنجائی وزیرپارے کہ پاکستان ءِ موسمیاتی بدلی تا رداٹ تعلیم نا بشخ اٹی بےشمار چیلنج مون تروک ءِ۔ اوپارے کہ پاکستان ءِ بھاز بھلو چیلنج مون تروک ءِ ولے وزارت تعلیم دا ویل ءِ بھاز ہلہلہ ئی وڑاٹ ہرفینے۔ اوپارے کہ نن دا ویل اتون مون تننگ کن تینا غٹ وسیلہ غاتے متحرک کرینن۔ اوپارے کہ حکومت پاکستان ہم تعلیمی ایمرجنسی نا پڑو کرینے۔ اوپارے کہ داوخت آ وزارت تعلیم ایلو وزارت آتون اواری اٹ اسکول اسکان رسینگ ، محدود انفراسٹرکچر، استاد آتا تربیت نا آب و چناتا غذائیت نا ویل آتے ایسر کننگ ءِ۔ ڈاکٹر خالد مقبول صدیقی پارے کہ ننا کوشست آتیان آبادی نا لحاظ اٹ اسکول آ ہنپروک آ چناتا کچ اٹی کمتی مننگ ءِ ولے جم کچ اٹی ودکی مننگ ءِ۔ اوپارے کہ ٹارگٹ انٹرویشن آتے تیار کننگ و لاگو کننگ کن پاکستان انسٹی ٹیوٹ آف ایجوکیشن نا پن اٹ اسہ خصوصی شعبہ اس تیار کننگانے ہرا پاکستان نا تعلیمی بشخ ءِ مون تروک چیلنج آتا بارواٹی سہی حساب وکتاب یکجا کیک۔ بنجائی وزیر تعلیم پارے کہ مسن تا تعلیم اسکان رسینگ اٹ دودوربیدہ ئی اڑاند آتے مر کننگ کن مسن تا تعلیم آ جہانی کانفرنس اسہ تاریخی سرسہبی اس مریک۔ اوپارے کہ مچ آ دنیا نا مذہبی اسکالر آخ مسن تا تعلیم نا مسخت نا مخ تفی ءِ کریر۔ اوپارے کہ پاکستان اسلا می ملک آتیٹی مسن تا تعلیم نا بابت غلط گمانی ءِ چٹفنگ نا زمواری ءِ ہرفینے۔