پاکستان آ موسمیاتی بدلی نا بھاز بھلو اثراس تمنگ ءِ، رومینہ خورشید عالم

اسلام آباد۔ 13 جنوری (اے پی پی) وزیراعظم نا کوآرڈی نیٹر موسمیاتی بدلی و چاگڑدی رابطہ رومینہ خورشید عالم پارینے کہ پاکستان آ موسمیاتی بدلی نا بھلو اثراس تمنگ ءِ، باسنی نا ریسہ، نوکاپ و خشک سالی زالبول و نوعمر مسن تا ذہنی جان جوڑی ءِ زہمی کرینے۔ داخیال آتا درشانی ءِ او دوشنبے نادے آ داڑے ناروے نا مسکوہی وزیراعظم کجیل میگنی بونڈیک تون اوڑدہی ٹی گپ وتران کرساکرے۔ وزیراعظم نا کمکار موسمیاتی چیلنج خاص وڑاٹ سوز توانائی نا کنڈآ گدریفنگ و جہانی آزموندہ غاتیان ہیل کننگ کن پاکستان نا عزم آ زور شاغا۔ اوناروے نا مسکوہی وزیراعظم نا انسانی حق اکن سوگو وکالت نا ستاءِ کرے و انسانی حق انا خلاف ورزی تتون مون تننگ کن جہانی کمکاری نا اہمیت آ زور شاغا و داچرجوئی ٹی خاص وڑاٹ کشمیر اٹی مروک آ خلاف ورزی تا حوالہ ءِ تس۔ او2022 نا نوکاپ نا بھسکار اثرآتیا ہم گپ وتران کرے ہرانا سوب آن سندھ و ایلو علاقہ غاتیٹی بھلو کچ اسے آ آبادی نا نقل مکانی مس و بلوچستان اٹی ناجوڑی تتون اوار اہم مالی، راجی ، نفسیاتی و جان جوڑی نا ویل ودی مس۔ اوپارے کہ نن موسمیاتی ڈپلومیسی ٹی نئے بیرہ پاکستان بلکن غٹ نزور ملک آتیکن کمکاری نا خواہندار اُن۔ موسمیاتی بدلی پاکستان ءِ بھاز زہمی کرینے بلکن نن خطرہ نا لحاظ اٹ پنچ میکو نمبر آٹی اُن۔ ناروے نا مسکوہی وزیراعظم موسمیاتی بدلی نا اثرآتے کم کننگ کن پاکستان تون کمک کننگ کن ناروے نا آمادگی نا درشانی ءِ کرے۔ اوناروے نا کنڈآن الیکٹرک گاڈی تا سرسہب نفاذ ءِ دروراسے نا وڑاٹ پیش کرسا پاکستان ءِ سوز توانائی نا کنڈآ گدریفنگ اٹ کمک کننگ کن تینا کڑد انا پیش کش کرے۔ دیوان اٹی ایڈیشنل سیکرٹری حماد شمیمی و جوائنٹ سیکرٹری محمد فاروق ئسک ہم بشخ ہلکر۔ خیر خواہی نا درشانی ٹی وزیر اعظم نا کوآرڈی نیٹر موسمیاتی بدلی رومینہ خورشید عالم ناروے نا ڈل انا باسک آتے سووینئرز و پاکستانی ساختہ فٹ بال پیش کرے۔