بنجائی وزیر حوالکاری عطاء اللہ تارڑ نا سینئر صحافی جاوید شہزاد نا کزیت آ ہڑزخواہی کن اونا اُراغا بس، دعاپاتیاکرے

راولپنڈی۔ 13 جنوری (اے پی پی) بنجائی وزیر حوالکاری، شینکاری ، قومی میرات و دودوربیدہ عطاء اللہ تارڑ دوشنبے نادے آ سینئر صحافی جاوید شہزاد نا کزیت آ ہڑزخواہی کن اونا اُراغا ہنا و ایماندار نا ایلم سینئر صحافی خرم شہزاد و ایلو خاہوت  تون ہڑزخواہی و ہمدردی نا درشانی ءِ کرے و ایماندار نا روح انا ثواب کن دعاپاتیاکرے۔ داوخت آ گپ وتران کرسا بنجائی وزیر حوالکاری پارے کہ جاوید شہزاد اسہ خواری کش و قابل ءُ صحافی اس ئس ہرا تینا زند انا گیشتر بشخ ءِ صحافت کن وقف کرے، اونا کزیت آن صحافت نا بشخ اٹی ودی مروک آ خلا اسُل پُر مننگ کپک۔ اوپارے کہ ایماندار نا صحافتی خذمت آتے مدام یات تخنگک ۔ بنجائی وزیرپارے کہ خاہوت نا ڈکھیائی ٹی بریبر نا شریک اُن، ایماندار جاوید شہزاد نا چناتے تنیا اِلیپنہ، اوفتا ہر ممکن خیال ءِ تخنگک۔ بنجائی وزیر حوالکاری ایماندار جاوید شہزاد نا درجہ غاتا بڑزی و خاہوت کن صبر وجمیل نا دعاکرے۔ داوخت آ وزیراعظم نا میڈیا کوآرڈی نیٹر بدر شہباز وڑائچ ہم ساڑی ئسک۔