اسلام آباد۔ 14جولائی (اے پی پی) وزیراعظم محمد نواز شریف پارینے کہ 2013ءنا گچین کاری تیان پد آن ہی اسہ بے سوب مہم اسے نا بناءکننگا۔ چارسال اٹی انت آن انت مرسا کرے، داوخت آ بیان کننگ کپرہ، داسہ دا مسٹ میکو جلہو مننگ ئِ، ملک ئِ اسہ وار ولدا پد بٹنگ نا کوشست مننگ ئِ ، جھیڑہ ئی جے آئی ٹی نا جھیڑہ ئی رپورٹ مخالف آتا بے بنداو دوبہ غاتا مجموعہ ئِ، چار ہزار پنہ غاتیٹی کرپشن و بدعنوانی نا ہچ ئُ دوبہ اسکان خلنگ تنے، ننا خاہوت نا 62سالہ کاروباری معاملہ غاتے مفروضہ، سورس رپورٹ، بہتان و دوبہ خلنگ نا بنداو آ نشانہ جوڑ کننگا۔ ننا سد آ شونداری ڈٹ آتیٹی اسہ پیسہ سے نا بدعنوانی، کمیشن یا کک بیکس نا ہچ ئُ داغ اس اف۔ توانائی نا درزن آ ڈٹ آک ننا دوراٹی لگار و پدریسہ لگنگ ئُ۔ فوج اتون اواری اٹ دہشت گرد آتا مخ ئِ پرغان، کراچی ٹی امن ئِ اڈ تسن، بلوچستان اٹی پاکستان نا ترانہ ئِ خلنگ انگ ئِ، معیشت شاندار شونداری کننگ ئِ، تخریبی سیاسی عنصر آتا سازش آتا چرجوئی مفئے تو نن 7 آن ہم زیات شرح نمو دوئی کننگ کینہ۔ جمعہ نا دے مسلم لیگ (ن) نا پارلیمانی پارٹی دیوان آن تران کرسا وزیراعظم محمد نواز شریف پارے کہ جھیڑہ ئی جے آئی ٹی جھیڑہ ئی رپورٹ ننا مخالف آتا بے بنداو دوبہ غاتا مجموعہ ئِ، دارپورٹ اٹی ننا موقف و شاہدی تے جھٹلائفنگ کن ہچ ئُ ٹھوس دستاویز اس پیش کننگ تنے۔ اوپارے کہ بیرہ ننا خاہوت نا 62سالہ کاروباری معاملہ غاتے مفروضہ ، سورس رپورٹ، بہتان و دوبہ خلنگ نا بنداو آ نشانہ جوڑ کننگانے۔ وزیراعظم پارے کہ ساڑی حالیت آک پاکستان نا 70 سالہ تاریخ ہی نا اسہ عکس اسے ئُ۔ اوپارے کہ جے آئی ٹی نا رپورٹ اتی اسہ جملہ اس ہم ہندن ئُ اف ہراڑآن اشارہ ہم ملے کہ نواز شریف کرپشن نا مرتکب مسنے۔ اوپارے کہ کنا اقتدار نا پنچ انگا دور و وزیراعلیٰ پنجاب شہباز شریف نا دور تیٹی اگہ ننا برخلاف رتی بھر کرپشن نا ہم کیس اس ارے تو مون آ اتنگے۔ سکینڈل تو مُر انا ہیت اس، رپورٹ نا چار ہزار پنہ غاتیٹی کرپشن، بدعنوانی نا ہچ ئُ دوبہ اسکان خلنگ تنے۔ او چیلنج کرے کہ اگہ اونا سد آ شونداری ڈٹ آتیٹی اسہ پیسہ سے نا کک بیکس ، کمیشن یا بدعنوانی نا داغ اس ارے تو مون آ اتنگے۔ وزیراعظم پارے کہ گڑاس تو پابو کنٹریکٹ، ٹھیکہ، ڈٹ اسے ٹی نواز شریف رتی بھر بدعنوانی کرینے۔ اوپارے کہ کنا کسر اٹی مشکل آتے اتنگا ولے ای تینا نظریہ و موقف آ سلوک مسٹ، کنانابود گوندسا گچین کاری تیان پیش کننگا ولے ہمت ئِ ہلیتوٹ، مشرف نا آمریت نا مون آ کاٹم ئِ شیف کتوٹ، وزیراعظم پارے کہ ای جان ئِ دلدست آ تخسا عدلیہ بحالی کن لانگ مارچ کریٹ، اینو ہرا بھلو بھلو لیڈر جوڑ مسنو توسنو ۔ اوپارے کہ کنے امریکی و برطانوی راہشون تا فون بس کہ نا جان ئِ خطرہ ئِ ، لانگ مارچ اکن پیش تمپیس، ای جمہوریت ، کانود نا حکمرانی و عدلیہ نا آجوئی آ باور کیوہ۔ اوپارے کہ عدلیہ آجوئی کن لانگ مارچ اسہ مشکل ئُ مشن اس ئس ولے نن مخلص ئسن، ہنداخاطران سرسہبی دوئی کرین۔ وزیراعظم پارے کہ 2013ءنا گچین کاری تیان پد ہی اسہ بے سوب ئُ مہم اسے نا بناءکننگا۔ گدرینگوک آ چار سال و دھرنہ غاتیٹی انت آن انت مرسا کرے ، ای داوخت آ بیان کننگ کپرہ۔ او است ہسونی نا درشانی ئِ کرے کہ ہرا ملک آک ننے آن پدی ئسر او ہم بھاز مون آ پیش تمانو۔ وزیراعظم پارے کہ 2013ءٹی پاننگاکہ کہ پاکستان دیوالیہ اس مریک، پاکستان بے سہب ئُ ریاست اسے، انت اینو مگے کسس دُن پاننگ ئِ؟ اوپارے کہ ڈکھ مریک کہ ننا داخہ خواری آن پد ملک ئِ اسہ وار ولدا پدی دِکہ تننگ نا کوشست مننگ ئِ۔
