اسلام آباد۔ 13جولائی (اے پی پی) پاکستان بھارتی فورس آتا کنڈآن ایل او سی و ورکنگ باﺅنڈری آ سیز فائر نا پدریسہ خلاف ورزی تیا بھاز گڑتی نا درشانی ئِ کرسا پارینے کہ بھارتی بیدادی علاقائی امن و سلامتی کن خلیس اسے، بھارت رزاک اٹ ایل او سی آ بے چیٹی تے ودفنگ ئِ، پاکستان بھارت تون غٹ ایسرنا چاری معاملہ غاتے مذاکرات نا کمک اٹ ایسر کننگ خواہک، بھارتی درخواست آ کلبھوشن یادیو نا لمہ ئِ ویزا تننگ آ سجفنگ انگ ئِ ، بھارت اینخو سال داوخت اسکان ایل او سی آ جنگ بندی نا 542وار خلاف ورزی کرینے، اوغانستان نا ویل فوجی واک اٹ ایسر کننگ مفک۔ پنچ شنبے نا دے دفترخارجہ نا ترجمان محمد نفیس ذکریا ہفتہ وار پریس بریفنگ اٹی صحافی تا چندی سوج آتا ورندی ئِ ترساپارے کہ بھارت کشمیری تا جہد آجوئی ئِ دہشت گردی ثابت کننگ نا بے سہب کوشست کننگ ئِ، سویلی ایشیاءٹی امن کشمیر نا ویل انا ایسری اسکان ممکن اف۔ ترجمان پارے کہ ہندا ہفتہ مقبوضہ کشمیر اٹی بھارتی فورس آتا بیدادی ٹی 6گناہ کشمیری شہید مسر وخت اس کہ برانزی مچی کروک آتے ہم بیدادی نا نشانہ جوڑ کننگا، جموں و کشمیر بین الاقوامی وڑاٹ تسلیم شدہ تنازع اسے۔ او اسہ وار ولدا جہانی برادری آن خواست کرے کہ او مقبوضہ کشمیر اٹی بھارتی بیدادی و انسانی حق انا سنگین خلاف ورزی تا نوٹس ہلے۔ ترجمان پارے کہ اینو مچ آ دنیا ٹی کشمیری 1931 اٹی شہید مروک آتا یات اٹی یوم شہداءاڈتننگ ئُ و نن ہم اوفتے تون یکجہتی نا درشانی ئِ کینہ۔ ترجمان پارے کہ بھارت دروغ نا داوا و دہشت گرد کارروائی تا ریکارڈ تخک وخت اس کہ بھارتی بیدادی ڈیہہ ٹی امن و سوگوی کن خلیس اسے۔ کرنل (ر) حبیب نا گم مننگ نا بابت اسہ سوج اسے نا ورندی ئِ ترسا ترجمان پارے کہ دا چرجوئی ٹی نیپالی کمامدارآتون رابطہ ٹی ئِ۔ اوغانستان نا بابت اسہ سوج اسے نا ورندی ئِ ترسا ترجمان پارے کہ اوغانستان نا ویل فوجی واک اٹ ایسر کننگ مفک۔ اوپارے کہ داویل اوغان حکومت و الس نا سروکی ٹی سیاسی مذاکرات اٹ ہی ایسر کننگ مریک ۔ اوپارے کہ پاکستان اوغانستان اٹی امن و سوگوی کن سنجیدہ کوشست کننگ ئِ۔
