اسلام آباد۔ 25 نومبر (اے پی پی) نائب وزیراعظم و وزیرخارجہ سینیٹر محمد اسحاق ڈار تون بیلاروس نا وزیرخارجہ میکسم رائزنکوف دوشنبے نادے آداڑے دفترخارجہ ٹی اوڑدہی کرے۔ دفترخارجہ نا کنڈآن جاری بیان نا رداٹ نائب وزیراعظم و بیلاروس نا وزیرخارجہ میکسم رائزنکوف ہڑتوم آ کنڈآتا و علاقائی امور و صدر لوکاشینکو نا دورہ ءِ پاکستان نا ایجنڈا و پروگرام آ گپ وتران کریر۔ اوپاکستان بیلاروس تعلقداری نا اہمیت آ زور شاغار و تین پہ تینی فائدہ مند کمکاری ءِ مو آ دننگ نا عزم انا درشانی ءِ کریر۔ فریق آک پاکستان و بیلاروس نا نیام اٹ ہڑتوم آ کنڈآتا ہن و بر و بڑزکو کہول انا دورہ غاتا رفتار آ است جمی نا درشانی ءِ کریر و دااومیت نا درشانی ءِ کریر کہ صدر لوکاشینکو نا دورہ غان ہڑتوم آکنڈآتا تعلقداری تے پین مون آ دننگک۔ اودے ٹک نیامی نا حالیت آتون اوار اہم علاقائی و جہانی پیش رفت آ ہم گپ وتران کریر۔ اوفک جھیڑہ غاتا پرامن ایسری کن تینا مخ تفی نا درشانی ءِ کریر و غزہ ٹی انسانی حالیت آتون مون تننگ کن اسہ مربوط نقطہ نظرنا گرج آ زور شاغار۔ اوہڑتوم آ کنڈآتا و علاقائی امور آ گپ وتران کیرہ و بیلاروس نا صدر الیگزینڈر لوکاشینکو نا دورہ نا ایجنڈا و پروگرام ءِ گڈیکو دروشم اس ایترہ ہرا اینو پاکستان نا مسہ دے ئی سرکاری دورہ غا سرمریرہ۔
