اسلام آباد۔ 25 نومبر (اے پی پی) بنجائی وزیر واپار جام کمال خان پارینے کہ پاکستان و بیلاروس نا نیام اٹ واپار اٹی ودکی المی ءِ، ہڑتوم آملک آتا نیام اٹ کشاری مشینری و آٹو موبائل نا بشخ آتیٹی کمکاری ءِ ودفنگک۔ داخیال آتا درشانی ءِ او دوشنبے نادے آ داڑے ہندی ہوٹل اٹی بیلاروس نا وزیر توانائی تون بزنس فورم نا اسیجائی کماشی ٹی کرے۔ تینا تران اٹی بنجائی وزیر واپار پارے کہ پاکستان۔ بیلاروس بزنس فورم اٹی ہشت مفاہمتی یات داشت و معاہدہ غاتیا دستخط کننگک۔ بنجائی وزیرپارے کہ پاکستان اٹ بیلاروس نا ٹیکٹر ز پائیداری و سوگوی نا علامت تکنگک و داڑے ہندی مارکیٹ اٹی اوفتا بھاز خواست بھاز زیات ءِ۔ اوپارے کہ ہڑتوم آ ملک آتا نیام اٹ واپار اٹی ودکی کن 2025-27کن روڈ میپ آ امنا کننگانے، ہڑتوم آ ملک آتا کمکاری کن عملی گام گیج کینہ۔ اوپارےکہ پاکستان و بیلاروس علاقائی واپار و کنیکٹیوٹی نا مو ن آ دننگ کن شنگھائی کمکار تنظیم اٹ شریدارہم اریر۔ پاکستان بیلاروس تون ٹیکنالوجی نا گدریفنگ و اسیجائی ڈٹ آتیٹی زرکاری نا خواہندار ءِ۔ جام کمال پارے کہ پاکستان اٹ درملکی زرکاری کن توانائی، کشت وکشار، آئی ٹی و ایلو بشخ آک ملوک ءُ۔ اوپارے کہ پاکستان و بیلاروس نا ہڑتوم آ کنڈآتا واپار اٹی ودکی اتنگ نا گرج ءِ۔ پاکستان آن سُو ، ڈیری ، کشاری مصنوعات نا برآمد آتے ودفنگ مریک۔ وزیرواپار پارےکہ بیلاروس اتون واپاری اڑاند آتے کم کننگ ومارکیٹ اسکان رسینگ ءِ آسان کننگ نا گرج ءِ، ہراڑآ بنجائی حکومت کاریم کننگ ءِ، پاکستان ڈیہہ اٹی واپاری و ٹرانزٹ حب مننگ کن سنبرینگوک ءِ، انتئے کہ پاکستان دنیا نا شش میکو بھلا واپاری مارکیٹ ءِ۔
