اسلام آباد۔ 25 نومبر (اے پی پی) اسپیکر قومی اسمبلی سردار ایاز صادق زالبول آتا برخلاف بیدادی نا چٹفنگ نا جہانی دے انا وخت آ تینا کلہواٹی پارےکہ زالبول آتا برخلاف بیدادی نا ہچ ءُ گنجائشت اس اف، و دا انسانیت نا بنداوی اصول آتا خلاف ورزی ءِ۔ اوپارےکہ اسہ مہذب و شون ہلوک راج اسے نا ٹہیفنگ کن زالبول آتے بریبری حق و رکھ فراوان کننگ المی ءِ۔ اسپیکر زالبول آتا راجی، زرگزرانی و سیاسی حیثیت ءِ گچین کننگ کن ہرممکن گام گج کننگ نا گرج آ زور شاغا۔ اوپارے کہ ملک انا نیمہ غان زیات آبادی زالبول آتیا تالان ءِ، اوفتے واکدار کننگ آن بیدس قومی شونداری نا تغ پورو مننگ کپک۔ سردار ایاز صادق غٹ اسٹیک ہولڈر آتیا زور شاغا کہ او زالبول آتا حق انا رکھ ءِ پک کننگ کن گچین کڑد ادا کیر۔ اوپارےکہ پاکستان نا آئین زالبول آتا حق انا ضمانت ایتک و پارلیمنٹ زالبول آتا رکھ و اوفتے واکدار کننگ کن چندی کانود آتے منظور کرے۔ پارلیمان اٹی جوڑ وومن پارلیمانی کاکس زالبول آتا حق انا رکھ و اوفتا راجی آسودہی کن فعال کڑد ادا کننگ ءِ۔ اسپیکر زالبول آتا برخلاف بیدادی نا چٹفنگ کن شعور بیدار کننگ و ہندن ءُ راج اسے نا جوڑ کننگ نا گرج آ زور شاغا ہراڑے زالبول آک عزت، رکھ وبریبری اتون زند ءِ تیرکننگ کیر۔ اسپیکر قومی اسمبلی سردار ایاز صادق زالبول آتیا مروک آ بیدادی نا چٹفنگ و اوفتے راجی و زرگزرانی وڑاٹ واکدار کننگ کن پارلیمان نا کڑد ءِ برجاتخنگ نا عزم انا درشانی ءِ کرے۔
