اسلام آباد۔24نومبر (اے پی پی):پاکستان پیپلز پارٹی ءِ چیئرمین بلاول بھٹو زرداری ءَ زالبولانی سر ءَ ھمک رنگ ءِ زوراکی ءِ ھلاسی ءِ واستہ یکجائی کوشست ءِ ارزشت ءِ سر ءَ زور پر دات آئی ءَ میاں اوستمانی روچ ءِ موہ ءَ وتی یک پیغامے ءِ تہ ءَ… زالبول آنی بااختیار کنگ ءُ آھانی رکھینگ، شرپ ءُ ھک آنی رکھینگ ءِ ھاترا پیپلز پارٹی ءِ صنفی برابری ءُ زالبول آنی بااختیار کنگ ءِ ھاترا وتی عزم ءِ پدا پدر کنگ ءَ آئی ءَ ترس، تبعیض ءُ زوراکی ءَ چہ آجو کتگ۔ آئی ءَ چاگرد ءِ جوڑ کنگ ءِ سر ءَ زور دات۔بلاول بھٹو زرداری ءَ جینڈر زوراکی ءِ شنگ ءُ تالان بوھگ ءِ سر ءَ سک باز جیڈھ ءِ درشانی کتگ ءُ ایشی ءِ سبب آناں سرجمیں کانود سازی، چاگردی ءُ دود ءُ ربیدگی اصلاحات ءِ وسیلگ ءَ گیش ءُ گیوار کنگ ءِ واستہ ترندیں گامگیج زورگ ءِ لوٹ کتگ۔ آئی ءَ گوشت کہ زالبول آنی سر ءَ زوراکی انسانی ھک آنی سنگینیں لگتمالی انت ءُ یک انصاف ءِ چاگرد ءِ جوڑ کنگ ءِ تہ ءَ مزنیں اڑاند انت۔ پاکستان ءَ زالبول آنی ھک آنی رکھینگ ءِ تہ ءَ پیپلز پارٹی ءِ ھاسیں کرد ءِ سر ءَ چمشانک دیان ءَ چیئرمین بلاول بھٹو زرداری ءَ گوشت کہ پیپلز پارٹی ءِ زالبول آناں مزن وزیر، اسپیکر ءُ وزیر گچین کنگ ءَ چہ بااختیار جوڑ کنگ ءِ یک فخر مندیں راجدپتر ءِ واھند اِنت۔ ایشی ءَ ابید زالبول ھم ھاسیں پجّاراں ایر کنگ بوتگ اَنت۔آئی ءَ شہید ذوالفقار علی بھٹو ءَ را 1973 ءِ آئین ءِ وسیلگ ءَ صنفی برابری ءِ بنیات ایر کنگ ءِ کریڈٹ داتگ کہ آئین ءَ صنفی تبعیض ءِ ھلاپ ءَ رکھینگ ءَ را دل یکیمی کتگ ءُ زند ءِ درستیں پڑ آنی تہ ءَ زالبول آنی بھر زوری ءَ را گیش کنگ بوتگ۔ آئی ءَ گیش گوشت کہ شھید ذوالفقار علی بھٹو ءَ زالبول آناں وانگ ءُ زانگ، آوانی بااختیار کنگ ءُ آوانی ھک آنی رکھینگ ءِ سر ءَ دلگوشی دیگ ءَ نوکیں راہ پچ کتگ اَنت۔
