اسلام آباد۔ 22 نومبر (اے پی پی) بنجائی وزیر داخلہ محسن نقوی نیشنل پولیس اکیڈمی ءِ یونیورسٹی نا درجہ تننگ و پاکستان ملٹری اکیڈمی کاکول طرز انا ادارہ اس جوڑ کننگ نا عزم انا درشانی ءِ کرساپارینے کہ پولیس اکیڈمی ٹی بطور سزا افسر آتے تعینات کننگ نا روایتء ِ چٹفوئی مریک، 10 آئی جی پولیس اکیڈمی نا آنرشپ ہلیر تو نن جوان انگا افسر آتے فیلڈ اٹ اتنگ کینہ، پولیس آفیسر آک تینا زمواری ، الس نا خذمت و ادارہ نا شونداری آ چکار تخر۔ او جمعہ نادے آ نیشنل پولیس اکیڈمی ٹی اے ایس پی 50کامن نا پاسنگ آؤٹ پریڈ آن تران کریکہ۔ وزیرداخلہ محسن نقوی غٹ سرسہب مروک آ آفیسر آتے مبارکبادی ترسا پارینے کہ تربیت پورو کروک آ آفیسر آتے کن غٹ آن اہم گڑا الس تون جوان رویہ و اوفتا خذمت ءِ۔ اوپارےکہ اگہ نم دیانت داری اٹ الس نا ویل آتے ایسر کیرے تو نم ہر پڑآ سرسہب مریرے۔ نیشنل پولیس اکیڈمی ءِ جہانی آب آ اتنگ نا عزم کرسا اونیشنل پولیس اکیڈمی ءِ پاکستان ملٹری اکیڈمی نا طرز آ اسہ جہانی آب انا اکیڈمی اس جوڑ کننگ کن دمدستی گام گیج آتا پڑو کرے۔ وزیرداخلہ پارے کہ نن اکیڈمی ءِ پوسکن کننگ کن 50 کروڑ روپئی نا بست و بند کرینن، ہرافتے ٹی 25 کروڑ نیشنل پولیس فاؤنڈیشن و 25 کروڑ حکومت نا کنڈآن تننگک۔ گچین آفیسر آتا تعیناتی و فیکلٹیز نا شونداری نا بابت وزیرداخلہ پارے کہ دا اکیڈمی ٹی گچین آفیسر آتا تعیناتی ءِ پک کننگک و اوفتا الاؤنس آک عام پولیس آفیسر آتیان زیات مریرہ تانکہ دا پوسٹ عزت و گمر نا سوب مرے۔ اوزورشاغا کہ دا روایت ءِ چٹفنگے کہ داڑے سزا نا وڑاٹ آفیسر آتے تعینات کننگے۔ سم کاری نا آسراتی و پوسکن ٹریننگ سینٹر آتا بابت وزیرداخلہ نا پاننگ ئس کہ اکیڈمی ٹی سم کاری نا آسراتی نا کمتی ءِ مر کننگ کن ٹاسک فورس اسے نا جوڑ کننگ نا پڑو ءِ کرے وپارے کہ نن پوسکن ٹریننگ سینٹر جوڑ کینہ ہراڑے ملک انا چندی بشخ آتیان مخلوق تربیت کن بریرہ۔ اوپارےکہ نیشنل پولیس اکیڈمی ءِ یونیورسٹی نا آب اسکان دننگ کن سلاہ تیا کاریم کننگک تانکہ پوسکن آ تربیتی کورس و لیٹسٹ ٹیکنالوجی نا کمک اٹ پولیس آفیسر آتے پین گچین کننگ مرے۔ وزیرداخلہ اومیت ظاہرکرے کہ پوسکن آ پولیس آفیسرآک السی خذمت اٹ بڑزکو کڑد ادا کیرہ۔
