اسلام آباد۔ 22 نومبر (اے پی پی) وزیراعظم محمد شہباز شریف انفارمیشن ٹیکنالوجی برآمد آتے 25 ارب ڈالرا سکان سرکننگ کن لائحہ عمل نا ستاءِ کرسا پارت کرینے کہ ہائر ایجوکیشن کمیشن ورناتے جہانی آب انا تعلیم و تربیت فراوان کننگ کن لائحہ عمل اس تیار کے و غٹ تعلقدار ادارہ غاک دابابت اواری اٹ کاریم کیر۔ جمعہ نادے آوزیراعظم آفس نامیڈیا ونگ آن جاری بیان نا رداٹ داخیال آتا درشانی ءِ وزیراعظم تینا کماشی ٹی آئی ٹی بشخ انا اصلاحات آ جاچ دیوان اٹی کرے۔ دیوان اٹی بنجائی وزیر اقتصادی امور احدخان چیمہ ، وزیر مملکت انفارمیشن ٹیکنالوجی شزہ فاطمہ خواجہ و تعلقدار بڑزکو کمامدارآک بشخ ہلکر۔ دیوانءِ آئی ٹی نا بشخ انا برآمد آتے 25 ارب ڈالر اسکان سرکننگ کن ہربشخ انا کچ آن معلومدار کرے۔ وزیراعظم نا آئی ٹی نا بشخ ءِ اولیت جوڑ کننگ نا ویژن اٹی تدوک آچا رتُو اٹی آئی ٹی نا بشخ انا برآمد آتیٹی 35 درسد ودکی مس۔ دیوان ءِ مستی پاننگا کہ ای گورننس نا بابت پاکستان جہانی رینکنگ اٹی 14 درجہ گچین مس، 2500 پوسکن آئی کمپنی رجسٹرمسنو وخت اس کہ پاکستان نا آئی ٹی رینکنگ 79آن گچین مرسا 40 مس۔ دیوان ءِ پاننگاکہ بروک آ 5 سال اٹی آئی ٹی نا بشخ انا برآمد آتا بابت 15 ارب ڈالر، ٹیلی کام برآمد آتیان 1 ارب ڈالر وخت اس کہ ڈیجیٹائزیشن آن 10 ارب ڈالر نا دوئی کننگ نا ہدف تخنگانے۔ دیوان ءِ آئی ٹی بشخ انا برآمد آتا ساڑی آ حالیت آتیان ہم معلومدار کننگا۔ دیوان ءِ سلاہ ئی لیبر مینجمنٹ سسٹم نا بابت ہم حوال تننگا ہرانا رداٹ صنعت آتیان طلب نا ڈیٹا ءِ کاریم اٹ اتنگ آن پد تعلیمی ادارہ غاتا کمک اٹ افرادی قوت نا کچ ءِ ودفسا روزگار نا فراوانی ءِ پک کننگک۔ دیوان ءِ آئی ٹی بشخ اٹی کاریم کروک آورناک خاص کر فری لانسر آتے زر راہی تس اٹی آسراتی کن مجوزہ ڈٹ آتا بابت ہم معلومدار کننگا۔ داوخت آ وزیراعظم پارے کہ پاکستان تون باصلاحیت افرادی قوت و وسیلہ غاتا کمتی اف۔ وسیلہ غاتا جوان کاریم اٹ اتنگ و افرادی قوت ءِ تعلیم و تربیت نا کمک اٹ پاکستان نا آئی ٹی برآمد 25 ارب ڈالر آن ہم گدرینگ انگ کیرہ۔ وزیراعظم پارت کرے کہ آئی ٹی نا بشخ انا اصلاحات نا پیش کروک لائحہ عمل گچین ءِ، داسہ اوڑآ عملدرآمد ءِ پک کیر۔ آئی ٹی برآمد آتیٹی ودکی کن پیش کروک اصلاحات نا کسر اٹ بروک چیلنج آتون مون تننگ کن غٹ ادارہ غاک اواری اٹ کمک کیر۔ وزیراعظم پارے کہ آئی ٹی بشخ انا اصلاحات آ عملدرآمد نا ای بذات خود چاروکی ءِ کیوہ۔ وزیراعظم پارت کرے کہ پاکستانی ورناتے جہانی آب انا تعلیم و تربیت و کسب تننگ کن ہائر ایجوکیشن کمیشن اسہ لائحہ عمل اس تیارکے۔ پاکستانی آئی ٹی چاہندار آتا خلیجی ملک آتیٹی طلب ساڑی ءِ، دابابت ہم سلاہ تے زوت عملی دروشم اس تننگے۔ وزیراعظم آئی ٹی برآمد آتے ودفنگ نا بابت پیدوار ہدف وضع کننگ و ہرگام انا بابت مدت انا تعین نا پارت کرے۔ وزیراعظم آئی ٹی بشخ انا اصلاحات نا نفاذ و چندی ادارہ غاتون کمکاری ءِ مون آ دننگ کن کمیٹی اس جوڑ کننگ نا ہم پارت کرے۔ وزیراعظم جہانی پیمنٹ گیٹ ویز نا بابت داگام ءِ جوان گوندسا اوڑآ زوت عملدرآمد نا پارت جاری کرے۔ دیوان ءِ ٹیلی کام بشخ انا بابت اصلاحات آن ہم معلومدار کننگا۔ وزیراعظم آئی ٹی نا بشخ آتا برآمد آتیٹی ودکی نا لائحہ عمل آ است جمی نا درشانی ءِ کرے، وزیر مملکت انفارمیشن ٹیکنالوجی و اونا ٹیم انا کوشست آتا ستاءِ کرے۔ وزیراعظم معین مد اٹ اوڑآ عملدرآمد نا پارت ہم جاری کرے۔
