اسلام آباد۔ 21 نومبر (اے پی پی) بنجائی وزیر داخلہ محسن نقوی تون برطانوی نائب وزیر خارجہ پاکستان و اوغانستان ہمیش فالکنر اوڑدہی کرے۔ ہراٹی تین پہ تینی است خواہی نا امور و پاک برطانیہ تعلقداری آ گپ وتران کریر۔ اوڑدہی ٹی ہڑتوم آ کنڈآ تا تعلقداری نا مون آ دننگ کن اسیجائی گام گیج آتیا ہم گپ وتران کننگا۔ بنجائی وزیر داخلہ محسن نقوی برطانیہ نا نائب وزیرخارجہ ہمیش فالکنر کن نیک است خواہی تا درشانی ءِ کرے۔ وزیر داخلہ پاک برطانیہ تعلقداری تے پین سوگو کننگ نا عزم انا درشانی ءِ کریر۔ اوڑدہی ٹی پاکستان و برطانیہ نا نیام اٹ گیشتر ہڑتوم آکنڈآتا و علاقائی امور آ سوگو ہم گرنچی نا گرج آ زور شاغنگا۔ بنجائی وزیر داخلہ محسن نقوی پارے کہ برطانیہ پاکستان نا سوگو و گچین سنگت ملک ءِ، وخت بسنے کہ تین پہ تینی کمکاری ءِ پائیدار اقتصادی پارٹنر شپ اٹ بدل کننگے۔ اوپارے کہ نا دورہ ءِ پاکستان آن ہڑتوم آکنڈآتا تعلقداری تیٹی پین گرم جوشی بریک۔ بنجائی وزیر داخلہ محسن نقوی داہیت آ زور شاغا کہ سوشل میڈیا بے بنداو و گمراہ کن ہوکاتالان کننگ و پروپیگنڈا کننگ نا برخلاف اسیجائی گام گیج کننگ نا گرج ءِ۔ بنجائی وزیر داخلہ پارے کہ پاکستان اٹ اقلیت آتے غٹ تر حق دوئی ءِ، اقلیتی برادری تا رکھ ننا اولیت ءِ۔ برطانوی ہائی کمشنر جین میریٹ و برطانیہ ٹی پاکستان نا ہائی کمشنر ڈاکٹر محمد فیصل ئسک ہم داوخت آ ساڑی ئسر۔
