کوئٹہ۔ 21 نومبر (اے پی پی) وزیراعلیٰ بلوچستان میر سرفراز بگٹی نا کماشی ٹی پنچ شنبے نادے آ بلوچستان بورڈ آف انویسٹمنٹ اینڈ ٹریڈ نا بورڈ آف ڈائریکٹرز نا دیوان اڈ ہلک۔ دیوان اٹی چیف سیکرٹری شکیل قادر خان، کوئٹہ چیمبر آف کامرس نا صدر محمد ایوب مریانی و ایلو کمامدارآک بشخ ہلکر۔ دیوان اٹی بلوچستان بورڈآف انویسٹمنٹ ءِ فعال کننگ نا فیصلہ ءِ کرسا زرکاری بورڈ انا سروک نا تقرری نا منظوری ءِ تننگا و صوبہ ٹی زرکاری کن چندی سلاہ تیا سجفنگ تون ملکی و درملکی زرکارآتا آسراتی کن فیسی لیٹیشن ہند جوڑ کننگ نا فیصلہ کننگا۔ دیوان اٹی بلوچستان اٹی زرکاری کن بلوچستان بزنس سمٹ کرفنگ نا فیصلہ ءِ کننگا وخت اس کہ وزیراعلیٰ بلوچستان چیف سیکرٹری نا کماشی ٹی کمیٹی اس جوڑ کرے۔ دیوان آن تران کرسا وزیراعلیٰ بلوچستان میر سرفراز بگٹی پارے کہ زرکارآتے کارخانہ جوڑ کننگ کن غٹ آسراتی فراوان کننگ ءِ پک کننگک۔ زرکارآتے فول پروف سیکورٹی ایتنہ، زرکارآک بے خوف و خلیس بلوچستان آ بریر، پورو سیکورٹی فراوان کینہ۔ وزیراعلیٰ پارے کہ بلوچستان اٹی پین انڈسٹریل اسٹیٹس نا جوڑ کننگ کن نجی زرکاربھاز است خواہی تخرہ، گیس، دیر، انفراسٹرکچر و بنداوی آسراتی فراوان کرسا زرکاری کن سازگار چاگڑد اس فراوان کینہ۔ اوپارے کہ ہندن ءُ ڈٹ جوڑ کننگے ہراڑآن صوبہ نا وسیلہ غاتیٹی ودکی مرے۔
