وزیراعظم نا بنوں ، ملی خیل اٹی دہشت گرد جلہو اٹی ورناتا شہیدی آ ڈکھیائی نا درشان، قربانیک اسُل زیان مفسہ ، شہباز شریف

اسلام آباد۔ 20 نومبر (اے پی پی) وزیراعظم محمد شہباز شریف ضلع بنوں نا علاقہ ملی خیل اٹی سیکورٹی فورس و فرنٹیئر کانسٹیبلری نا ورناتا شہیدی آ ڈکھیائی نا درشانی ءِ کرسا پارینے کہ قوم انا مارتا قربانیک اسُل زیان مفسہ، الس نا جان و مال ءِ خطرہ ٹی بٹوک آ فتنتہ الخوارج آتے بھاز بھلو قیمت اس ادا کروئی تمک۔ چارشنبے نادے آ وزیراعظم آفس نا میڈیا ونگ انا کنڈآن جاری بیان اٹی وزیراعظم محمد شہباز شریف پارے کہ ضلع بنوں نا علاقہ ملی خیل اٹی سیکورٹی فورس آک 6 خوارج آتے جہنمی کریر و دا عمل اٹی تینا جون تے ندر کریر۔ اوپارے کہ ملک آن دہشت گردی نا پورو چٹفنگ اسکان ننا دہشت گرد آتا برخلاف جنگ برجاسلک۔ ضلع بنوں نا علاقہ ملی خیل اٹی چیک پوسٹ آ خوارجی تا جلہو اٹی شہید مروک آتیٹی صوبیدار عمران احمد فاروقی شہید، حوالدار محمد جاوید اقبال شہید، نائیک طہماس شہید ، نائیک باسط فرید شہید، سپاہی صفدر علی شہید، سپاہی اسد بشیر شہید، سپاہی اعجاز حسین شہید، سپاہی عاطف خان شہید، سپاہی امان اللہ شہید، سپاہی شاہ زمان شہید، سپاہی حسیب اللہ شہید و عثمان اللہ شہید ئسک اوار ءُ۔