اسلام آباد۔ 20 نومبر (اے پی پی) بنجائی وزیر داخلہ محسن نقوی بنوں نا علاقہ ٹی سیکورٹی فورس آتا چیک پوسٹ آ خوارجی دہشت گرد آتا جلہو نا ترندانگا لوز آتیٹی مذمت ءِ کرسا پارینے کہ وطن نا نرزور گلزادہ غاک تینا جون تے ندر کرسا دہشت گرد آتا ناپاک عزم ءِ بے سہب کریر۔ چارشنبے نادے آتینا بیان اٹی وزیرداخلہ محسن نقوی جام شہادت نوش کروک آ 12 ورناتے خراج عقیدت پیش کرے و خاہوت آتون ہمدردی و ہڑزخواہی نا درشانی ءِ کرے۔ وزیرداخلہ محسن نقوی پارے کہ وطن نا امن نا خاطر جون تے ندر کروک آپاک فوج انا ورناک قوم انا ہیروک ءُ۔ سیکورٹی فورس آتا بہادر گلزادہ غاتا عظیم قربانی تے تاقیامت یات تخنگک۔ قوم شہیدآتا مدام مقروض سلک۔ اوپارے کہ دہشت گردی نا برخلاف جنگ اٹی پاکستان نا بے مٹ قربانی تا ہچ ءُ نظیر اس ملپک۔ شہید آتا خاہوت آتون سلوک اُن و مدام اوفتے تون سلنہ۔
