راولپنڈی۔ 20 نومبر (اے پی پی) سیکورٹی فورس آک بنوں ٹی دہشت گرد آتا جلہو ءِ بے سہب کریر، سیکورٹی فورس آتا ورندی کارروائی ٹی 6 دہشت گرد خلنگار وخت اس کہ دھماکہ خیز مواد آن پُر گاڈی اسے نا ڈوک لگنگ آن دھماکہ ٹی 12 سیکورٹی کارندہ شہید مسر۔ آئی ایس پی آر نا رداٹ 19 نومبر 2024 آ خوارج آک بنوں نا علاقہ ملی خیل اٹی اسیجائی چیک پوسٹ آ جلہو نا کوشست کریر۔ اسہ ایلو آ ورندی سم کاری ٹی 6 خوارج آتے خلنگا۔ سیکورٹی فورس آک جلہو گیر آتا کنڈآن پوسٹ اٹی پترینگ انگ نا کوشست ءِ بے سہب کریر اوکان پد خوارج آک دھماکہ خیزمواد آن پُر اسہ گاڈی اسے پوسٹ انا دیوال اتون خلکر۔ خودکش دھماکہ غان پوسٹ انا دنگ انا دیوال نا اسہ بشخ اس تما و خڑک انا ماڑی تے نسخان رسینگا۔ داواقعہ ٹی سیکورٹی کارندہ 12 ورنا شہید مسر، ہرافتے ٹی سیکورٹی فورس آتا 10 و فرنٹیئر کانسٹیبلری نا 2 کارندہ اوار ءُ۔ آئی ایس پی آر نا پاننگ ءِ کہ علاقہ ٹی کلیئرنس آپریشن برجاءِ و دا گندہ انگا عمل نا زموار آتے عدالت نا مون آ اتنگک۔ پاکستان نا سیکورٹی فورس و کانود نافذ کروک آ ادارہ غاک دہشت گردی نا ناسور ءِ ماس آن چٹفنگ کن سنبرینگوک ءُ۔ ننا بہادر گلزادہ غاتا دا قربانیک ننا عزم ءِ پین سوگو کیرہ۔
