اسلام آباد۔ 20 نومبر (اے پی پی) بنجائی وزیر ڈٹ بندی شونداری و اصلاحات و خصوصی گام گیج پروفیسر احسن اقبال پارینے کہ جی ایس پی پلس پاکستانی برآمد آتا شونداری ٹی اہم کڑدادا کرینے و ملک انا زرگزران ءِ سوگو کننگ نا موقع فراوان کرینے، اونا فائدہ غاتے آخبتی کننگ کن آب و پالیسی تے گچین کننگے تانکہ جہانی مارکیٹ اٹی مسابقت برقرار سلے۔ داخیال آتا درشانی ءِ او چارشنبے نادے آ فریڈرک نعمان فاؤنڈیشن نا رداٹ واپار نا کمک اٹ گچین گورننس نا مون آ دننگ نا دود آن تران کرساکرے۔ اوپارے کہ جی ایس پی پلس پروگرام پاکستان نا برآمد آتیٹی ودکی کرینے، ٹیکسٹائل، سِل انا گڑا و کشاری مصنوعات نا بشخ ءِ فائدہ تسنے، ٹیکسٹائل یورپی یونین ءِ پاکستانی برآمد آتا مخ انا ملی ءِ، جی ایس پی پلس نا رداٹ ودوک آ برآمد آک روزگار نا وارخواہی ودی کریر و نیزگاری ٹی کمتی ایسُر، احسن اقبال پارے کہ یورپی یونین و پاکستان نا گپ وتران چاگڑدی آب و گورننس اصلاحات آ ٹی ءِ، پاکستان ءِ ٹیکنالوجی و کسب نا شونداری کن یورپی یونین نا واپاری پالیسی آن بایدے فائدہ ہرفے ، یورپی یونین تون واپاری شریداری پاکستان کن اہم ءِ۔ احسن اقبال پارے کہ جی ایس پی پلس پروگرام اقتصادی شونداری، گورننس و واپاری تعلقداری تا مون آدننگ اٹ اہم کڑدادا کننگ ءِ، واپار، سول سوسائٹی و جہانی برادری نا نیام اٹ کمک المی ءِ تانکہ داپروگرام نا پورو لائخی ءِ پک کننگ مرے، حکومت نا پائیدار شونداری ایجنڈا ٹی واپار و ایکسپورٹس ءِ اولیت تننگانے، پائیدار زرگزرانی سوگوی کن گچین گام گیج کننگ انگ ءِ۔ احسن اقبال پارے کہ زرگزرانی سوگوی کن پبلک پرائیویٹ شریداری اہم پک مریک، 5 ایز فریم ورک اٹی ایکسپورٹ ، انرجی، ایکویٹی ، ای پاکستان وانوائرمنٹ اوار ءُ۔ ملکی زرگزران مثبت کنڈآ ہِننگ ءِ۔ جی ایس پی پلس آن یورپی منڈی تیکن پاکستان نا برآمد آتیٹی نمان ودکی مس۔ موسمیاتی بدلی نا اثرآتیان پاکستان نا زرگزران ءِ نسخان رسینگا۔ اوپارےکہ آخبت اٹی 2022 کون آ نوکاپ تون مون تننگ کن ڈٹ بندی کروئی مریک۔ پاکستان نا برآمد آتیٹی ودکی کن گیشتر وارخواہی ساڑی ءِ۔ ملکی برآمد آتیٹی ودکی کن نجی بشخ انا است بڈی ءِ کننگ انگ ءِ۔ احسن اقبال پارے کہ ملک اٹی قابل تجدید توانائی ءِ مون آدننگ کن گام گیج کننگ انگ ءِ۔ جی ایس پی پلس آ عملدرآمد نا جاچ ءِ ہلنگ کن زوت ٹاسک فورس اس جوڑ کننگک۔ برآمد آتیا تالان زرگزران آن پائیدار شونداری نا ہدف آتا دوئی کننگ ممکن ءِ۔
