اسلام آباد۔ 20 نومبر (اے پی پی) بنجائی وزیر داخلہ محسن نقوی تون سعودی عرب نا نائب وزیر داخلہ ڈاکٹر ناصر بن عبدالعزیز الداؤد اوڑدہی کرے ہراٹی تین پہ تینی است خواہی نا امور، پاک سعودیہ تعلقداری نا مون آ دننگ، پیراملٹری فورس، پولیس ڈل آتا تین پہ تینی ہن وبر و اسیجائی ٹریننگ نا امور تیا گپ وتران کننگا، ہڑتوم آ ملک آتا نیام اٹ بندی تا ہل و تس نا معاہدہ غا عملدرآمد آ امنا مس۔ چارشنبے نادے آ اسلام آباد اٹی مروک آدا بڑزکو کہولی اوڑدہی ٹی سعودی عرب نا سفیر نواف بن سعید احمد المالکی ہم داوخت آ ساڑی ئس۔ وزیرداخلہ محسن نقوی اسلام آباد و ریاض ءِ جاڑ انگا شار گوندنگ نا سلاہ تس ہراڑآ سعودی وزیر امنا کرے۔ اوڑدہی ٹی فیصلہ مس کہ دا رداٹ پین المی گام گیج کننگک۔ اوڑدہی ٹی پاکستان آن پنڈوک آتے سعودی عرب گدریفوک آ مافیا نا سرکوبی آ ہم گپ وتران مس۔ وزیرداخلہ پارے کہ 4300 پنڈوک آتا پن ءِ ای سی ایل اٹی اوار کننگانے۔ اوپارے کہ سعودی عرب آ ہنوک آ پنڈوک آتا برخلاف زیروٹالرنس پالیسی ءِ تیناکرینے، داوڑنا پنڈوک مافیا نا برخلاف مچ آ ملک اٹی گچین کریک ڈاؤن کننگ انگ ءِ۔ داہیت آ ہم اتفاق مسنے کہ سعودی عرب اٹی بند 419 پاکستانی تا وطن آ پدی اتنگ کن کانودی کارروائی تے زوت پورو کننگک۔ وزیرداخلہ محسن نقوی نا پاننگ ئس کہ سعودی عرب ننا ایلم اسلامی ملک ءِ، ہڑتوم آکنڈآتا کمکاری نا مون آ دننگ کن ہرممکن کمک کینہ۔ اوپارے کہ سعودی شاری تیکن پاکستان آ بننگ آ ہچ ءُ ویزہ پابندی اس اف، ہراتم او خوار بننگ کیرہ۔ بنجائی وزیر داخلہ محسن نقوی سعودی عرب نا ولی عہد محمد بن سلمان نا وژن 2030 انا ستاءِ کرے۔ اوپارے کہ ساڑی سرکڑدہ ٹی سعودی عرب 2030 اسکان زرگزرانی، راجی و اقتصادی بشخ آتیٹی اقوام عالم اٹی نمان ہند اس دوئی کیک۔ نائب وزیرداخلہ سعودی عرب پارے کہ پاکستان تون بھاز خڑکی تعلقداری ءِ ہرادے نن پین مون آ دننگ خوانہ، وخت اس کہ پیراملٹری فورس و پولیس نا تین پہ تینی ہن و بر و اسیجائی ٹریننگ کن تیار ءُ۔ ایڈیشنل سیکرٹری داخلہ، اسپیشل سیکرٹری داخلہ، کمانڈنٹ فرنٹیئر کانسٹیبلری ، چیف کمشنر اسلام آباد، آئی جی اسلام آباد پولیس و ڈپٹی کمشنر اسلام آباد ئسک ہم داوخت آساڑی ئسر۔
