اسلام آباد۔ 20 نومبر (اے پی پی) وزیراعظم محمد شہباز شریف پارینے کہ ہر چناءِ آب اٹ تعلیم، جان جوڑی نا آسراتی و اسہ رکھ و پرورش کروک ءُ چاگڑد اس فراوان کننگ حکومت نا فرض ءِ تانکہ چناک تینا پورو لائخی تے دوئی کننگ کیر و راج اٹ مثبت ءُ کڑد اس ادا کننگ کیر، جہانی یوم اطفال ننے دا اجتماعی زمواری نا یات ترفک کہ نن بے پرخ ہرچنانا حق انا رکھ و پوروی ءِ پک کین۔ چارشنبے نادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف تینا کلہو اٹی پارے کہ اینو جہانی یوم اطفال نا وخت آ ای پاکستان نا چناتا حق ، راجی آسودہی و شونداری کن تینا عزم انا درشانی ءِ کیوہ، داچناک ننا آخبت نا جوڑ کروک و قوم انا غٹ آن نہادی میرات ءُ۔ وزیراعظم پارے کہ دادے ننے دا اجتماعی زمواری نا یات ترفک کہ نن بے پرخ ہرچنانا حق انا رکھ ءِ پک کین۔ اوپارے کہ دا ننا فرض ءِ کہ نن ہرچناءِ آب اٹ تعلیم ، جان جوڑی نا آسراتی، رکھ و پرورش کروک ءُ چاگڑد اس فراوان کین تانکہ او تینا پورو لائخی تے اٹ راج اٹ مثبت کڑد ادا کننگ کیر۔ وزیراعظم پارے کہ پاکستان نا حکومت چناتا زند آتے گچین کننگ کن چندی گام گیج کرے دُن کہ دانش اسکول آتا جوڑ کننگ ہرا مرمر انگا و پدسلوک آ علاقہ غاتیٹی کم وسیلہ چناتے آب اٹ تعلیم فراوان کننگ ءُ، دااسکول آک بے شمار چناتا زند آتے بدل کریر و اوفتے روشنا ءُ آخبت اسے نا کسر ءِ نشان تسنو۔ اوپارے کہ نن تعلیمی ایمرجنسی نا پڑو ءِ کرینن ہرانا رداٹ وسیلہ غاتے متحرک کرسا خواندگی نا کچ اٹ ودکی، اسکول آتا پوسکن تفنگ و چناتے آب اٹ تعلیم نا فراوانی ءِ پک کننگ انگ ءِ۔ وزیراعظم پارے کہ کمیونٹی آؤٹ ریچ و خاہوت آتے چناتے اسکول آ گدریفنگ نا ترغیب تننگ کن خصوصی مہم آتا کمک اٹ اسکول آ ہنپروک آ لکھ آچناتا داخلہ کن کوشست کننگ انگ ءِ۔ اوپارے کہ غذائی کاختی ءِ مر کننگ و تعلیمی نتیجہ غاتے گچین کننگ کن حکومت سرکاری اسکول آتیٹی غذائیت نا پروگرام درستی راستی کرینے تانکہ چناتے جان جوڑ کن وخور رسینگے ہرا اوفتا جونی نشوونما و شونہالی کن کوشست کننگ ءُ۔ اوپارے کہ ای لمہ و باوہ، استاد، سول سوسائٹی و پالیسی ساز آتیان خواست کیوہ کہ او اواری اٹ اسہ ہندن ءُ راج اس جوڑ کیر ہراڑے ہر چنانا اہمیت مرے و او تینے رکھ و نہادی محسوس کیر۔ اوپارے کہ جہانی یوم اطفال نا وخت آ ببو نن قول کین کہ تینا چناتے قومی اولیت آتیٹی اولیت ایتنہ و اسہ ہندن ءُ آخبت اس پک کینہ ہراڑے او عزت، بریبری و اومیت اتون مون آہِننگ کیر۔
