اسلام آباد۔ 19 نومبر (اے پی پی) بنجائی وزیر توانائی (پاور ڈویژن) سردار اویس احمد خان لغاری تون جرمن سفیر الفریڈ گراناس اوڑدہی کرے ہراٹی توانائی نا بشخ اتون اوار تین پہ تینی است خواہی نا امور تیا گپ وتران کننگا۔ سے شنبے نادے آ مروک آ اوڑدہی ٹی اویس لغاری پارے کہ جرمنی قابل تجدید توانائی نا بشخ اٹی جہانی راہشون ءِ، پاکستان 2034 اسکان تینا توانائی مکس اٹی 88 درسد قابل تجدید توانائی اوار کیک۔ اوپارے کہ پاکستان بھاز زمواری اٹ توانائی نا بشخ اٹی اسہ مسابقتی مارکیٹ اس درستی راستی کرفنگ ءِ، تانکہ بجلی نا ہل و بہاٹی پین بشخ ہلوک آک اوار مننگ کیر۔ اویس لغاری پارے کہ بجلی نا بشخ اٹی زرکاری نا خاطرخواہ وارخواہی ساڑی ءِ ہرافتے آن جرمن زرکارآک پبی فائدہ ہرفنگ کیرہ، جرمنی پاکستان نا اسہ قابل قدر شونداری شریدار ءِ و بی ٹو بی رابطہ غاتے مون آ دننگ ننا ہڑتوم آ کنڈآتا تعلقداری نا اسہ اہم ءُ عنصر اسے۔ جرمن سفیر الفریڈ گراناس پارے کہ توانائی نا بشخ اٹی آرٹیفیشل انٹیلی جنس و بیٹری سٹوریج ٹیکنالوجی نا سوب آن بجلی ہرہنوک آ دے اتون پین قابل استطاعت جوڑ مننگ ءِ۔ اوپارے کہ جرمنی پاکستان نا توانائی نا بشخ اٹی اصلاحات نا مالی کمکاری کن سنبرینگوک ءِ تانکہ پاورسیکٹر نا بنداوی ویل آتے ایسر کننگ مرے۔ جرمن سفیر پارے کہ جرمن نجی بشخ پاکستان نا توانائی نا بشخ اٹی اسہ فعال کڑد ادا کننگ ءِ و چندی ڈٹ آتیٹی کمکاری ءِ برجاتخک۔ اوڑدہی ٹی فریق آک قابل تجدید توانائی ٹی کمکاری ءِ مون آ دننگ و ایلو شونداری ڈٹ آتیٹی تین پہ تینی سلابت ءِ مون آدننگ آ امنا کریر۔
