اسلام آباد۔ 19 نومبر (اے پی پی) وزیراعظم محمد شہبا زشریف ہر مشکل اٹی پاکستان تون تفنگ آ سعودی سرکڑدہ و حکومت نا منت واری ءِ ہرفسا پارینے کہ پاکستان و سعودی عرب اقتصادی و زرکاری کمکاری ءِ پین سوگو کننگ کن اواری اٹ کاریم کننگ ءُ۔ سے شنبے نادے آوزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون سعودی عرب نا نائب وزیرداخلہ ڈاکٹر ناصر بن عبدالعزیز الداؤد سے شنبے نادے آ داڑے وزیراعظم ہاؤس اٹی اوڑدہی کرے۔ وزیراعظم سعودی نائب وزیرداخلہ ءِ بخیرکرسا اوڑکن نیک است خواہی نا درشانی ءِ کرے۔ وزیراعظم خادم الحرمین الشریفین شاہ سلمان بن عبدالعزیزآل سعود و سعودی عرب نا ولی عہد و وزیراعظم شہزادہ محمد بن سلمان کن ہم نیک است خواہی نا درشانی ءِ کرے۔ ہڑتوم آملک آتا نیام اٹ تاریخی، برادرانہ تعلقداری تا ذکر ءِ کرسا وزیراعظم ہرمشکل وخت اٹی پاکستان تون تفنگ آ سعودی سرکڑدہ و حکومت نا منت واری ءِ ہرفے و پارے کہ پاکستان و سعودی عرب تین پہ تینی وڑاٹ فائدہ مند اقتصادی و زرکاری کمکاری ءِ پین سوگو کننگ کن اواری اٹ کاریم کننگ ءُ۔ وزیراعظم پاکستان اٹ 2.8 ارب امریکی ڈالر نا سعودی زرکاری نا بابت سعودی عرب و پاکستا ن نا نیام اٹ مفاہمت نا یات داشت آتیا عملدرآمد آ تینا است جمی نا درشانی ءِ کرے۔ اوڑدہی ٹی غزہ و دے ٹک نیامی نا حالیت آتیا ہم گپ وتران کننگا۔ ریاض اٹی مروک آ ساڑی آ عرب اسلامی سروکی کانفرنس نا ذکر ءِ کرسا وزیراعظم سروکی دیوان نا اڈتننگ آ سعودی عرب نا سرکڑدہ غاتا ستاءِ کرے و فلسطین اٹ اسرائیل نا نسل کشی نا گام گیج آتا برخلاف و غزہ ٹی بیدادی نا چٹفنگ کن اجتماعی وڑاٹ امت مسلمہ ءِ یکجا کننگ نا سعودی ولی عہد و وزیراعظم محمد بن سلمان نا کوشست آتا ستاءِ کرے۔ ہڑتوم آملک آتا نیام اٹ دفاع و سلامتی نا بشخ آتیٹی کمکاری نا اہمیت آ زور شاغسا وزیراعظم پارے کہ سعودی عرب نا نائب وزیرداخلہ و اونا ڈل انا دورہ داحساس بشخ آتیٹی کمکاری نا بابت ہڑتوم آ ایلم اسلامی ملک آتے خڑک اتنگ اٹ کمک ایتک۔ وزیراعظم سعودی ولی عہد ووزیراعظم شہزادہ محمد بن سلمان ءِ پاکستان نا سرکاری دورہ ءِ کننگ نا سلہ نا درشانی ءِ کرے و پارےکہ پاکستانی الس اونا جم وجوش اٹ بیابخیری نا چاری ءُ۔
