اسلام آباد۔ 19 نومبر (اے پی پی) بنجائی وزیر ڈٹ بندی شونداری و اصلاحات و خصوصی گام گیج پروفیسر احسن اقبال پارینے کہ تعلیم نا نظام ءِ پوسکن آ خواست آتون ہم گرنچ کننگ نئے بیرہ وخت انا گرج ءِ بلکن ننا بروک آ چین تا سرسہبی کن بنداوی شڑت ہم ارے۔ تختی آن ٹیکنالوجی اسکان نا سفر ننا تعلیم نا ارتقاء نا عکاسی ءِ کیک، و دا سفر ترند رفتار شونداری نا کنڈآ اشارہ کیک۔ داخیال آتا درشانی ءِ او سے شنبے نادے آانٹربورڈ کوآرڈینیشن کمیشن نا کنڈآن اڈہلوک ماڈل ایسسمنٹ فریم ورک نا لانچنگ دود آن تران کرساکرے۔ اوپارے کہ اینو نا دور علم آ تالان زرگزران نا ءِ، ہراڑے ٹیکنالوجی، تخلیقی لائخی و پوسکن آ کسب ورناتیکن جہانی زرگزران اٹ ہند دوئی کننگ نا بنداوی عنصر آک ءُ۔ ننے تینا تعلیمی نظام ءِ ہمو نصاب و ہیلکاری پروگرام تے آن شپ کروئی مریک ہرا طالب علم آتے نئے بیرہ ساڑی دور انا بلکن آخبت نا چیلنج آتون مون تننگ کن تیار کیر۔ دامسخت کن ننے انقلابی گام گیج کروئی مریک۔ اوپارے کہ وژن 2025نا رداٹ وزارت تعلیم ءِ نصاب وامتحانی نظام نااصلاح نا ڈٹ تننگا، استاد آتا تربیت آن بیدس آب اٹ تعلیم نا تغ پورو مننگ کپک، زوت ہی اسلام آباد اٹی جہانی آب انا ٹیچر ٹریننگ ادارہ جوڑ کننگک، امتحانی نظام اٹ اصلاحات آن بیدس تعلیمی آب گچین مننگ کپک۔
