کوئٹہ۔ 19 نومبر (اے پی پی) وزیراعلیٰ بلوچستان میر سرفراز بگٹی پارینے کہ پاکستان تون غیرمشروط وفاداری ائین نا جز و ننا اخلاقی فرض ءِ ، تاریخ گواہ ءِ کہ ہرا پاکستان تون وفاکرے اللہ تعالیٰ اودے عزت تس ہرا پاکستان تون غداری کرے او ذلیل و رسوا مس، ننا غٹ تر لائخی وخواری پاکستان کن بایدے مرے۔ داہیت انا درشانی ءِ او سے شنبے نادے آ داڑے جناح الائٹ اسکول سائنس اینڈ آرٹ ایگزی بیشن نا بناءِ کرساکرے۔ داوخت آ صوبائی وزیر تعلیم راحیلہ حمید خان درانی و ادارہ نا سروک سردار اسامہ ترین ئسک ہم ساڑی ئسر، اوطالب علم آتا کنڈآن خلوک آ سائنسی سٹال آتا معائنہ ءِ کرے و چناتا سائنسی تخلیق آتا ستاءِ کرسا اودے شاباشی تس۔ دود آن تران کرسا وزیراعلیٰ میر سرفراز بگٹی پارے کہ بلوچستان نا آخبت زیبا و خواری کش آ دوتیٹی ءِ، اینو نا طالب علم آخبت نا لیڈر و بلوچستان نا سفیر ءُ ہرافتے آخبت نا بھاگ دوڑ ءِ سنبھالوئی ءِ، ننے تینا آخبت نا جوڑ کروک آتون بھاز انگا اومیت آک وابستہ ءُ، داٹی ہچ ءُ دورائے اس اف کہ ننا آخبت نم کون آ لائخ و خواری کش ورناتا سوب آن رکھوک ءِ۔ اوپارے کہ بلوچستان نا ورناک نئے بیرہ قومی بلکن جہانی کہول آ ہم تینا لائخی تے منفینو و نن تینا ورناتیا گمر کینہ۔ اونا پاننگ ئس کہ بلوچستان اٹی روایتی تعلیم تون پوسکن آ تعلیم نا مون آ دننگ سخت المی ءِ، داڑے آرٹیفیشل انٹیلی جنس آ تالان پروجیکٹ ءِ خناٹ بھاز خوشی مس داکان مست لگ بھگ ہرتعلیمی ادارہ ٹی الف انار و ب بکری والا روایتی تعلیم مون آبس ولے اینو دا پوسکن آ تعلیم نا طرز ءِ خناٹ بھاز خوشی مس ، طالب علم ہندا مثبت مائنڈ سیٹ ءِ ہلسا مون آ بریر۔ داوخت آ وزیراعلیٰ بلوچستان اسکول کن 10 لکھ روپئی کیش ایوارڈ وخت اس کہ ٹیبلو پیش کروک آ چناتیکن اسہ لکھ روپئی نغد انعام نا پڑوکرے۔
