اسلام آباد۔ 19 نومبر (اے پی پی) اسپیکر قومی اسمبلی سردار ایا زصادق تون برطانیہ نا وزیر و پارلیمانی انڈرسیکرٹری امور خارجہ، دولتِ مشترکہ و شونداری ہمیش فالکنر اوڑدہی کرے۔ سے شنبے نادے آ قومی اسمبلی سیکرٹریٹ آن جاری بیان نا رداٹ اسپیکر پارلیمنٹ ہاؤس آ بننگ آ ہمیش فالکنر ءِ بخیرکرے۔ اسپیکر برطانیہ نا پارلیمانی انڈر سیکرٹری امور خارجہ، دولتِ مشترکہ و شونداری، ہمیش فالکنر کن نیک است خواہی نا درشانی ءِ کرے۔ اسپیکر دولت مشترکہ نا باسک ملک آتا نیام اٹ پارلیمانی رابطہ غاتیٹی ودکی نا گرج آ زور شاغسا پارینے کہ پاکستان دولت مشترکہ نا اسہ فعال و سرگرم ءُ باسک اسے، دولت مشترکہ نا اسہ زموار باسک اس مننگ نا حیثیت اٹ پاکستان مدام دولت مشترکہ نا فیصلہ و پالیسی تا پاسداری ءِ کرینے۔ سردار ایاز صادق پارے کہ پاکستان اٹ جمہوری ادارہ غاتے سوگو کننگ کن برطانیہ و دولت مشترکہ نا کوشست ستاکڑزک، پاکستان برطانیہ تون تینا متکن، تاریخی و دوستانہ تعلقداری تے بھاز اہمیت ایتک۔ وزیر/پارلیمانی انڈر سیکرٹری ہمیش فالکنر پاکستان اٹ جمہوری ادارہ غاتے سوگو کننگ کن کمکاری ءِ برجاتخنگ نا عزم انا درشانی ءِ کرے۔ پارلیمانی انڈر سیکرٹری امور خارجہ، دولت مشترکہ و شونداری، ہمیش فالکنر جم و جوش اٹ بخیرکننگ آ اسپیکر قومی اسمبلی نا منت واری ءِ ہرفے۔
