اسلام آباد۔ 18 نومبر (اے پی پی) بنجائی وزیر ڈٹ بندی، شونداری و خصوصی گام گیج احسن اقبال پارینے کہ پاکستان ۔ا مریکہ نالج کوریڈور پروگرام پاکستان و امریکہ نا نیام اٹ تعلیم و پٹ وپول نا بشخ اٹی اسہ اہم ءُ مزل اسے نا حیثیت تخک، داپروگرام نئے بیرہ ہڑتوم آ ملک آتا تعلقداری تے سوگو کننگ اٹ کمکارءِ بلکن پاکستانی طالب علم و چاہندار آتے جہانی کہول آ مسابقتی لائخی فراوان کیک۔ دوشنبے نادے آ یوایس ایڈ نا دود آن تران کرسا بنجائی وزیر ہفت دہائی تیا تالان پاک امریکہ تعلقداری تا سرسہبی تے تالان کرے و ہڑتوم آ کنڈآتا کمکاری ءِ پین سوگو کننگ نا عزم انا درشانی ءِ کرے۔ داوخت آ پاکستان اٹی امریکی سفیر ڈونلڈ بلوم ویو ایس ایڈ مشن ڈائریکٹر ویریا(کیٹ) سوم وونگسیرئسک ہم ساڑی ئسر۔ احسن اقبال پارے کہ ہڑتوم آ ملک آتا نیام اٹ چندی بشخ، خاص کر تعلیم، انفراسٹرکچر، توانائی و ٹیکنالوجی ٹی کمکاری نا گیشتر وارخواہی ساڑی ءِ، دا تین پہ تینی کمکاری نئے بیرہ ہڑتوم آ کنڈآتا تعلقداری تے پین سوگو کیک بلکن پاکستان نا راجی و اقتصادی شونداری کن ہم کمکار مریک۔ احسن اقبال پارے کہ علاقائی شونداری و شونہالی کن امن اہم حیثیت تخک، پاکستان تینا اسٹریٹجک اہمیت نا رداٹ ڈیہہ اٹی رابطہ کاری و شونداری کن شریدار ءِ، پاک امریکہ تعلقداری تے سوگو کننگ کن تین پہ تینی شرف و اسیجائی مسخت آتیا تالان شریداری ءِ مون آ دننگ وخت انا اہم ءُ گرج اسے۔ بنجائی وزیر پاک امریکہ تعلقداری نا تاریخی بنداوتے مون آ تخا ہرا دفاعی کمکار ی آن بناکرسا اسہ سوگو شونداری شریداری ٹی بدل مسنے۔ اوتعلیم، انفراسٹرکچر و اقتصادی شونداری آ چکار کرسا کمکاری نا پوسکن آ پلو آتے مو آ دننگ نا گرج آ زور شاغا تانکہ مون آ بروک جہانی چیلنج آتا مقابلہ ءِ کننگ مرے۔
