اسلام آباد۔ 18 نومبر (اے پی پی) چیئرمین وزیراعظم یوتھ پروگرام رانا مشہود احمد خان پارینے کہ ملک اٹی ٹینس تون اوار ایلو گوازی تا مون آ دننگ کن سازگار چاگڑد و ہرممکن آسراتی فراوان کننگ کن سنبرینگوک اُن، ٹینس مقابلہ غاتیٹی پیشن نا ملک آن گوازی گرآتا بشخ ہلنگ آن ملک انا مثبت تشخص تالان مریک ۔ داخیال آتا درشانی ءِاو دوشنبے نادے آ انٹرنیشنل ٹینس فیڈریشن جونیئر لیگ نا بنائی دود آن تران کرسا کرے۔ چیئرمین وزیراعظم یوتھ پروگرام رانا مشہود احمد خان اعصام الحق نا ٹینس نا پڑاٹ خذمت آتا اعتراف کرسا پارے کہ اوپاکستان ءِ دنیا ٹی درستی راستی کرفے، اعصام الحق پاکستان نا حقی مثبت تشخص ءِ تالان کننگ اٹ اہم کڑد ادا کرے۔ اوپارے کہ 12 ملک آتیان تعلق تخوک آ گوازی گر آتا ایونٹ اٹی بشخ ہلنگ ستاکڑزک۔ اوپارے کہ ملک اٹی گوازی تا بحالی کن وزیراعظم محمد شہباز شریف نا کماشی ٹی ورناتے وارخواہی فراوان کننگ کن گام گیج کننگ ءِ۔ اوپارے کہ ٹینس نا پڑاٹ فیڈریشن ءِ ہراکمک درکار مریک فراوان کینہ۔ اوپارے کہ وزیراعظم یوتھ پروگرام نا رداٹ ملک اٹی گوازی تا مون آدننگ کن لائخ آ گوازی گرآتے وارخواہی فراوان کننگ انگ ءِ، ٹیلنٹ ہنٹ سپورٹس اٹی ٹینس ءِ ہم اوار کینہ، 21 نومبرآن اسپورٹس نا بھلا ایونٹ ’’یونیورسٹی اولمپیاڈ ‘‘بناکننگ والا ءِ۔ دانا بروک آ ایونٹ اٹی ٹینس ءِ ہم اوار کینہ۔ اوپارے کہ پاکستان آن مثبت خبر بننگ بناکرینے، ملکی زرگزران گچینی نا کنڈآ ہِننگ ءِ، اسٹاک ایکسچینج 95 ہزار پوائنٹ آتا ریکارڈ اس جوڑ کرینے، کبینی ٹی کمتی و زرراہی تس اٹی ودکی مسنے، درملکی زرکاری دُوارہ پاکستان آ بننگ ءِ۔ اوپارے کہ ہربشخ اٹی ننے شون ہلوئی ءِ، وزیراعظم محمد شہباز شریف نا کماشی ٹی ملک شونداری نا کنڈآ ہِننگ ءِ۔
