اسلام آباد۔ 18 نومبر (اے پی پی) اسپیکر قومی اسمبلی سردار ایاز صادق پارینےکہ پارلیمان ملک اناجان جوڑی نا بشخ ءِ سوگو کننگ کن سنبرینگوک ءِ، ورناڈاکٹر آک جان جوڑی نا نظام اٹی مثبت بدلی اتنگ نا بے پناہ لائخی تخرہ، اوفتا خواری،عزم و ہمدردی دا بشخ ءِ پوسکن آ بڑزی تیا دننگ اٹ کمک کیک، لس بندغ عدالت اٹی تینا کیس و ہسپتال اٹ تینا درمان کن کل گڑاتے قربان کیک داوڑاٹ جوان لوز و بشخندہ اودے پوسکن ءُ زند اس ایتک۔ داخیال آتا درشانی ءِ او دوشنبے نادے آ کالج آف فزیشنز اینڈ سرجنز پاکستان (سی پی ایس پی ) نا 57 می کانووکیشن آن تران اٹی کرے۔ ہراٹی سلاہکار جان جوڑی پنجاب میجر جنرل (ر) اظہر کیانی، مسکوہی نگران وزیر جان جوڑی پنجاب ڈاکٹر جمال ناصر، ایف سی پی ایس نا صدر ڈاکٹر شعیب شفیع آن بیدس مچ آملک آن پنی آ ڈاکٹر، پاس آؤٹ مروک آ ورناڈاکٹرو اوفتا خاہوت نا بھلو کچ اس ساڑی ئسر۔ اسپیکر پارے کہ اینو داکان پاس آؤٹ مروک آ ورناڈاکٹر آک ملک انا جان جوڑی نا نظام نا شونداری کن مزل نا نشان نا حیثیت تخرہ۔ اوسی پی ایس پی نا خذمت آتا ستاءِ کرسا اودے پاکستان نا گچین ادارہ غاتیان اسٹ اس گوندا ہرانئے بیرہ قومی بلکن جہانی کہول آ ہم تینا پہچان اس تخک۔ اسپیکر قومی اسمبلی ورناڈاکٹرآتے تلقین کرے کہ او تینا کڑد ءِ بیرہ درمان اسکان محدود تخپس بلکن ناجوڑ آتون ہمدردی، ایمانداری و اخلاقیات آ تالان تعلق جوڑ کیر۔اوپارے کہ ساڑی آچیلنج کون آ خلقی علاقہ غاتیٹی جان جوڑی نا خذمت آتا فراوانی و لمہ و چنانا جان جوڑی ٹی گچینی نما عزم و مہارت آن بیدس ایسر مننگ کپک۔ سی پی ایس پی نا شش دہائی تیا تالان خذمت آتا ذکر ءِ کرسا پارے کہ اسپیکر پارے کہ دا ادارہ پوسٹ گریجویٹ طبی تعلیم اٹی بڑزکو آب اس جوڑ کننگ اٹ پیش پیش مسنے۔ اوادارہ نا سرکڑدہ غاتے خراج تحسین پیش کرے ہرا پوسکن آ نصاب و ٹیکنالوجی تا کمک اٹ تینا فارغ مروک طالب علم آتے جہانی آب انا طبی ماہر جوڑ کننگ ءُ۔ اونا پاننگ ئس کہ فارغ مروک آ بندغ آتا سرسہبی داہیت انا شاہدی ءِ کہ داادارہ بیرہ تعلیم آخابلکن ہمدردی و انسانیت نا قدر ءِ ہم مو ن آ دیک۔ اسپیکر قومی اسمبلی پیدوار کرے کہ پارلیمنٹ جان جوڑی نا بشخ انا شونداری کن سی پی ایس پی کون آ ادارہ غاتون ہرممکن کمک کیک ۔ اوادارہ نا سرکڑدہ غاتیا زور شاغا کہ او تعلیم تون اوار اوار اخلاقی و ہمدردنہ سرکڑدہ غاتے مون آدننگ آ ہم چکارتخر۔ سردار ایاز صادق گریجویٹس و اوفتا لمہ و باوہ غاتے مبارکبادی ترساپارے کہ دا سرسہبی اوفتا خواری و قربانی تا بھرم ءِ۔ اوپارے کہ ننے نمے آ فخر ءِ و اومیت ءِ کہ نم تینا مہارت و خذمت آتیان پاکستان نا جان جوڑی نا نظام اٹ انقلاب اس اتیرے۔ اسپیکر پارے کہ جان جوڑ راج اناٹہیفنگ کن جان جوڑی نا بشخ اٹی گچینی المی ءِ۔ میڈیکل نا تعلیم دوئی کروک آ ورناک تینا خاہوت کن قابل فخر مریرہ، دامقدس ءُ پیشہ سے، ڈاکٹر آن مریض ءِ اللہ تعالیٰ نا ذات آن پد غٹ زیات اومیت وابستہ مریک۔ اوپارےکہ لمہ و باوہ تینا اولیاد ءِ زیات آن زیات شون ہلسا ہُننگ خوارہ، انسانیت نا خذمت آن ود پین ہچءُ کاریم اس متبر اف، انسانیت نا خذمت ءِ کرسا ہرا خوشی و سکون است ءِ ملک اونا ہچ ءُ بدل اس اف۔
