لاہور۔ 18 نومبر (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پارینے کہ پی ٹی آئی نا ظہیر عباس کھوکھروار وار آ تاریخ خواہسا الیکشن ٹربیونل نا وخت ءِ زیان کننگ اٹی ءِ، اگہ اوڑتون شاہدی اف تو عدالت ءِ پائے اوڑآن ردینک مسنے، اول کیس کہ ولدا عدالت آن نرہ، دااوفتا وطیرہ جوڑ مسنے۔ دوشنبے نادے آ پی ٹی آئی نا ظہیر عباس کھوکھر نا کنڈآن تینا برخلاف الیکشن ٹربیونل اٹی تروک آ درخواست اٹی تاریخ ہلنگ آ ردعمل نا درشانی ءِ کرسا بنجائی وزیر حوالکاری پارےکہ اینو کنا وکیل آک الیکشن ٹربیونل اٹی پیش مسر، ننا وکیل آتا پورو تیاری ئس، و غٹ دستاویز آک ہم ساڑی ئسر۔ اوپارے کہ مخالف پارٹی تون ہچ ءُ شاہدی و ثبوت اس الوکہ۔ بنجائی وزیرپارےکہ ظہیر عباس کھوکھر عدالت آن نرنگ خواہک، ہنداخاطرآن عدالت آن سماعت ءِ پدبِٹنگ نا خواست کرے، اگہ اوڑتون شاہدی ئس تو ظہیر عباس کھوکھر تاریخ انت اکن خواہس؟ ظہیر عباس کنا سرسہبی ءِ چیلنج کرینے تو داسہ انت اکن مون تفننگ ءِ؟ اوپارے کہ وار وار آ تاریخ خواہسا دا الیکشن ٹربیونل نا وخت ءِ زیان کننگ ءِ۔ اگہ اوڑتون شاہدی اف تو عدالت ءِ پائے کہ اوڑآن ردینک مسنے۔ اوپارے کہ اول کیس کہ ولدا عدالت آن نرہ، دا پی ٹی آئی نا وطیرہ جوڑ مسنے۔
