اسلام آباد۔ 15 نومبر (اے پی پی) سینیٹ اٹی مسلم لیگ (ن) پارلیمانی پارٹی نا لیڈر و سینیٹ نا قائمہ کمیٹی قومی جان جوڑی نا باسک سینیٹر عرفان صدیقی پارینے کہ سینیٹ نا قومی جان جوڑی کمیٹی پورو سنجیدگی اٹ پرائیویٹ میڈیکل کالج آتیٹی خوانوک آ چناتیا بھلا فیس آتا باندات نا جاچ ءِ ہلنگ اٹی ءِ ، دا چرجوئی ٹی سینیٹر پلوشہ خان نا کماشی ٹی اسہ مسہ باسکی ذیلی کمیٹی نا باضابطہ نوٹیفکیشن اس جاری مسنے ہرا بروک آ ہفتہ تینا کاریم نا بناءِ کیک۔ داہیت ءِ او اسلام آباد نا میڈیکل کالج اٹی خوانوک آ طالب علم و اوفتا لمہ و باوہ نا اسہ ڈل اسےتون گپ وتران کرسا پارے ہر اجمعہ نادے آ سینیٹر صدیقی نا دفتراٹی اوڑتون اوڑدہی کرے۔ لمہ و باوہ و طالب علم آک سینیٹر عرفان صدیقی ءِ تینا ویل آتیان معلومدار کرسا پاریر کہ کالج آک اسہ کنڈی وڑاٹ فیس آتیٹی بھلو ودکی اس کرینو ہرا تدوک آ سال انا نسبت کیہی گنازیات ءُ۔ پرائیویٹ کالج پی ایم ڈی سی ن اپارت آتا ہم پاش آن پاش خلاف ورزی کننگ ءُ۔ سینیٹر عرفان صدیقی ڈل ءِ باور کرفے کہ سب کمیٹی نا رپورٹ بننگ آن پد پی ایم ڈی سی پارت آتا خلاف ورزی کننگ و من مانی وڑاٹ فیس آتیٹی ودکی کروک آ ادارہ غاتا برخلاف کانود نا رداٹ جوان کارروائی کننگک، داباندات حکومت نا رداٹ ہم ارے ہرا زوت جوان گام کیک۔ ڈل قومی جان جوڑی کمیٹی نا چیئرمین سینیٹر عامر چشتی و ایلو باسک آتا منت واری ءِ ہرفے ہرا دا اہم باندات نا جاچ ءِ ہلسا طالب علم آتے استحصال آن بچفنگ نا کوشست کننگ ءُ ۔
