اسلام آباد۔ 15 نومبر (اے پی پی) بنجائی وزیر داخلہ محسن نقوی تون ترکیہ نا وزیرداخلہ علی یرلیکایا اوڑدہی کرے ہراٹی تین پہ تینی است خواہی نا امور، پاک ترکیہ تعلقداری نا مون آدننگ آ گپ وتران کننگا۔ اوڑدہی ٹی ترکیہ ٹی 3 پاکستانی بندی تا وطن آ واپسی نا بابت گپ وتران کننگا۔ بنجائی وزیر داخلہ محسن نقوی پارے کہ ترکیہ تون تاریخی برادرانہ تعلقداری ءِ ، پاکستان وترکیہ مذہبی رشتہ غاتیٹی تفوک ءُ۔ اوپیدوار کرے کہ پاک ترکیہ تعلقداری پائیدار شریداری ٹی بدل مننگ ءِ۔ وزیرداخلہ محسن نقوی ترکیہ نا ہم منصب ءِ پاکستان نا دورہ نا سلہ خلک۔ ترکیہ نا وزیر داخلہ پارے کہ پاکستان ایلم ملک ءِ، زوت اسلام آباد نا دورہ ءِ کیوہ۔ ترکیہ نا وزیر داخلہ پاکستانی بندی تا وطن آ واپسی کن کمکاری نا باوری کرفے۔ اوپارےکہ پاکستان دارداٹ چاہندار آتا ڈل ترکیہ غا گدریفے، ہمدردانہ جاچ ہلنگک۔ بنجائی وزیر داخلہ محسن نقوی 23 اکتوبر آ انقرہ ٹی دہشت گرد آتا جلہو نا ترند انگا لوز آتیٹی مذمت ءِ کرسا پارے کہ دہشت گرد آتا نئے مذہب اس ارے نئے علاقہ اس، دہشت گردی نا چٹفنگ داوخت آ اسہ جہانی ءُ چیلنج اسے۔ اوداہیت آ زور شاغاکہ اقوام عالم ءِ داناسور تون مون تننگ کن جوان گام گیج و اسیجائی حکومت عملی نا گرج ءِ۔ وزیرداخلہ محسن نقوی ساہا انٹرنیشنل ایکسپو آ گچین بست وبند و مہمانداری آ ترکیہ نا وزیرداخلہ نا منت واری ءِ ہرفے۔
