کراچی۔ 15 نومبر (اے پی پی) پاکستان پیپلزپارٹی نا چیئرمین بلاول بھٹو زرداری بلدیاتی ادارہ غاتا ضمنی گچین کاری تیٹی کراچی تون اوار سندھ انا تینا جماعت نا سرسہبی آ منت واری نا درشانی ءِ کرسااودے پارٹی آ الس نا پبی پت ومخ تفی نا درشانی و جیالہ غاتا خواری تا بھرم گوندانے۔ میڈیا سیل بلاول ہاؤس آن جاری بیان نا رداٹ پی پی پی چیئرمین ضمنی بلدیاتی گچین کاری تیٹی سرسہب مروک آ غٹ پارٹی اومیتدار آتے مبارکبادی تس و ہموکارندہ غاتے خراج تحسین پیش کرے، ہرادے و نن خواری کرسا گچین کاری تیٹی سرسہبی ٹی اہم کڑد ادا کریر۔ اوپارے کہ کراچی تون اوارمچ آ سندھ اٹی اسہ وار ولدا تیر چلینگا، و شہید بینظیر بھٹو نا جیالہ غاک کٹار۔ اوپارے کہ ضمنی بلدیاتی گچین کاری تا نتیجہ غاتیان پاش ءِ کہ الس اسہ وار ولدا خار و بشخنگ نا سیاست ءِ مسترد کرسا بے پرخ السی خذمت ءِ گچین کرینے۔ اوپارے کہ کراچی ٹی پاکستان پیپلزپارٹی نا اومیتدار آتا بھلا مارجن اٹ کٹسا سویپ کننگ ہم تاریخی پیش رفت اسے، چیئرمین بلاول بھٹو زرداری پاری نا پوسکن گچین مروک بلدیاتی نمائندہ غاتے پارے کہ اودے یقین ءِ کہ نم الس نا پت آ پورو سلیرے۔ گچین کاری تیٹی سرسہبی نما کوپہ غاتیا بھلو زمواری و امتحان اس ایسنے۔ نمے کچ اٹ وسیلہ و زیات ویل آتاحالیت آتون مون تروئی مریک، ولے اونا ایسر پارٹی ویژن نا نفاذ و نماخواری ءِ۔
