اسلام آباد۔ 15 نومبر (اے پی پی) نائب وزیراعظم و وزیرخارجہ سینیٹر محمد اسحاق ڈار نا کماشی ٹی کابینہ کمیٹی نجکاری نا دیوان اس داڑے اڈ ہلک۔ جمعہ نادے آ نائب وزیراعظم نا آفس آن جاری بیان نا رداٹ کابینہ کمیٹی نجکاری نا دیوان اٹی کمیٹی نا ایلو باسک آک بشمول نجکاری، صنعت و خور، واپار، بجلی ، وزارت خزانہ و محصولات نا وزیر و چندی ڈویژن آتا بنجائی سیکرٹریک ہم بشخ ہلکر۔ کابینہ کمیٹی نجکاری پی سی بورڈ انا سلاہ تیا سجفے ہرانا رداٹ او بلیو ورلڈ انا کنڈآن پاکستان انٹرنیشنل ایئرلائنز کارپوریشن لمیٹڈ (60 درسد حصص) نا بشخنگ کن پیش کروک آ 10 ارب روپئی نا بولی ءِ مسترد کننگ نا سفارش کرے۔ کابینہ کمیٹی نجکاری پی سی بورڈ انا سفارش ءِ امنا کننگ نا فیصلہ کرے و بولی ءِ مسترد کرے۔ کابینہ کمیٹی نجکاری حکومت نا پاکستان انٹرنیشنل ایئر لائنز کارپوریشن لمیٹڈءِ نجکاری یا G2Gموڈ نا کمک اٹ جتا کننگ نا عزم انا درشانی ءِ کرے۔ کابینہ کمیٹی نجکاری پی آئی اے سی ایل نا جان جوڑ مالیات آ ایوی ایشن ڈویژن نا جاچ ءِاست جمی اٹ نوٹ کرے۔ بیان نا رداٹ کابینہ کمیٹی نجکاری وزیر مملکت خزانہ نا کماشی ٹی اسہ کمیٹی اس ہم جوڑ کرے ہرا روز ویلٹ ہوٹل نا نجکاری کن گمانی لین دین نا واکداری و دوئی کانودی دفعہ غاتے مون آ تخسا اختیار کروک آ وڑوڈول آتا جاچ ءِ ہلیک۔ کابینہ کمیٹی نجکاری بروک آ دیوان آن مست غٹ ویل آتا ایسر و سروسز انٹرنیشنل ہوٹل نا بہاکننگ نا معاہدہ ءِ گڈیکو دروشم اس تننگ نا ہم پارت کرے۔
