اسلام آباد۔ 15 نومبر (اے پی پی) بنجائی وزیر صنعت و پیداوار رانا تنویرحسین پارینے کہ کھد انا وخت آ دستیابی ءِ پک کننگ کن حکومت و تعلقدار ادارہ غاک گام گیج کننگ ءُ،خواست اٹی ودکی نا رداٹ کھد انا نہاد آتیا ہم نظرتخنگ نا گرج ءِ، تانکہ بزغرآتیا مالی بھاریم ودپ۔ داخیال آتا درشانی ءِ او جمعہ نادے آ فرٹیلائزر ریویو کمیٹی نا دیوان نا کماشی ءِ کرساکرے۔ اوپارے کہ کھد انا ہچ ءُ کمتی اس اف، ڈی اے پی کھد انا خواست اٹی ودکی مننگ ءِ ہرانا گمانی سوب آتیٹی کشاری پیدوار اٹی ودکی و بزغر آتا کندآن ڈغار نا زرخیزی ءِ گچین کننگ نا کوشست آک اوار مننگ کیرہ۔دیوان اٹی ربیع سیزن کن ڈی اےپی و یوریاکھد انا سٹاک نا پوزیشن نا سرجمی اٹ جاچ ءِ ہلنگا۔ کمیٹی ملک اٹی کھد انا ساڑی کوڑی آ پورو است جمی نا درشانی ءِ کرے۔ بنجائی وزیر پارے کہ ملک اٹی ڈی اے پی و یوریاکھد ہڑتوم آتا ہچ ءُ کمتی اس اف، ڈی اے پی کھد انا خواست ودنگ ءِ و اونا کھپت اٹی 44 درسد ودکی مسنے۔ رانا تنویر حسین پارے کہ حکومت پنجاب نا جاری کروک بزغرکارڈ انا سوب آن ڈیمانڈ ودا، بزغرآتا گرج آتے پورو کننگ کن کھد انا ودکی کوڑی دستیاب ءِ۔ اونا پاننگ ئس کہ کشارگر ربیع نا سیزن اٹی ڈی اے پی نا جوان کاریم اٹ اتنگ آن ودکی پیدوار دوئی کیرہ، بزغرآتا شونہالی آن ملک شون ہلیک، کوڑی کننگ و نہاد آتیٹی شیف بڑزی نا برخلاف صوبہ غاک سخت کارروائی کیر۔
