اسلام آباد۔ 15 نومبر (اے پی پی) بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال پارینے کہ آخبت ءِ گچین کننگ کن ورناتے زیات آن زیات تعلیم و عملی وڑاٹ ہیل کننگ نا وارخواہی فراوان کننگے، دا وارخواہی نئے بیرہ تعلیمی ادارہ غاتے ٹی مرے بلکن چندی تکنیکی ، فنی و کاروباری مہارت آتا پروگرام نا کمک اٹ ہم بایدے مرے۔ داخیال آتا درشانی ءِ او جمعہ نادے آ اسلام آباد کالج طالب علم آتیٹی وزارت تعلیم و نیشنل بک فاؤنڈیشن نا کنڈآن 3 دے ئی پاکستان لرننگ فیسٹیول نا بناءِ کرساکرے۔ اوپارے کہ کنا باوہ سرمایہ دار یا جاگیردار اس الوکہ بلکن ای تعلیم نا سوب آن داہند آ سرمسونٹ، ای ہراتم 1983ٹی امریکہ نا ٹاپ وارٹن اسکول کن داخلہ مضمون اس نوشتہ کریٹ تو سوج ئس کہ نی 10 سال آن پد تینے ہراڑے خنسہ، ای نوشتہ کریٹ تینے پبلک آفس نا کمک اٹ پاکستان نا خذمت ءِ کرسا ہُننگ خواوہ، 1984ٹی داخلہ ملا و1986ٹی گریجویشن کریٹ و پدی بسٹ۔ احسن اقبال پارے کہ وارٹن آن ایم بی اے نا ڈگری ہلنگ آن پد مچ آ امریکہ نا مون آ سلک، ای تینا دھرتی لمہ پاکستان آ پدی بسٹ و 93 ٹی قومی اسمبلی نا ممبر نا سوغند ہرفیٹ، ہفت سال آتیٹی ہمو عہدہ ءِ ہلکٹ ہرا 10 سال آتا ٹارگٹ ئس، دا کِسہ خودنمائی کن بِنفنگ افٹ، داملک نمے نما ہر تغ انا پوروی ءِ تننگ کیک بشرطیکہ نم خواری کبو۔ بنجائی وزیر پارے کہ دا ملک انشاء اللہ ایشیا نا گچین ملک آتیٹی اوار مریک ، ہراتم نم 1200میٹر نا رُمب اٹی شریک مریرے و اسہ ہزار میٹر نا رُمب آن پد سماتماکہ نی پدی سلیسونن تو آخری 200 میٹر نا رُمب اٹی ترند انگا دُدینگ مریک۔ 2047ٹی دا ڈیہہ اٹی اِرا ملک سد سال نا آجوئی نا جشن ءِ اڈایترہ، ہمووخت آ کنانسل شاید ساڑی مف ولے نم 30-35سال نا وئی ٹی جوبن آ مریرے ، قول کبو 2047 اٹی پاکستان ءِ صف اول ملک اس جوڑ کیرے۔ اوپارے کہ شونداری کن امن سوگوی و ایلمی ءِ تینا کروئی مریک ، ہراٹیم اسہ ایلو تون لگر انت او میچ اس کٹنگ کیرہ۔ ہراٹیم میچ ءِ کٹک او اسہ ایلو تون اتفاق اٹ رہینگرہ۔ اونا پاننگ ئس کہ بیدادی نا جاگہ غا مکالمہ نا کلچرءِ مون آ دننگ نا گرج ءِ، نن ورناتے کرینگ و خار انا جاگہ غا گچین تعلیم و اخلاق اٹ آراستہ کینہ۔
