ریاض۔ 11 نومبر (اے پی پی) وزیراعظم محمد شہباز شریف پارینے کہ پاکستان و سعودی عرب نا نیام اٹ دہائی تیا تالان برادرانہ تعلقداری ہر ہنوک آ دے اتون پین سوگو مننگ ءِ، سعودی عرب ہر مشکل وخت اٹی پاکستان تون تفینے۔ پاکستان نا کسبکار افرادی قوت کن سعودی عرب اٹی روزگار نا وارخواہی نا بابت زوت بھلو پیش رفت اس گمانی ءِ۔ دوشنبے نادے آ وزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف تون سعودی عرب نا وزیر زرکاری خالد بن عبدالعزیز الفالح و ایڈوائزر رائل کورٹ محمد التویجری عرب۔ اسلامک سمٹ نا وخت آ اوڑدہی کرے ہراٹی ہڑتوم آملک آتا نیام اٹ ساڑی آ اقتصادی کمکاری نا بابت پیش رفت آ گپ وتران کننگا۔ وزیراعظم پارے کہ پاکستان و سعودی عرب نا نیام اٹ دہائی تیا تالان برادرانہ تعلقداری ءِ ہرہنوک آ دے اتون پین سوگو مننگ ءِ، سعودی عرب ہر مشکل وخت اٹی پاکستان تون تفینے۔ وزیراعظم خادم حرمین الشریفین شاہ سلمان بن عبدالعزیز و سعودی ولی عہد و وزیراعظم شہزادہ محمد بن سلمان کن نیک است خواہی نا درشانی ءِ کرے۔ اوپارےکہ فیوچر انویسٹمنٹ انیشی ایٹیو فورم نا وخت آ سعودی ولی عہد و وزیراعظم محمد بن سلمان تون اوڑدہی بھاز فائدہ ئس۔ وزیراعظم پارے کہ سعودی وزیرزرکاری نا ساڑی آ دورہ پاکستان ہڑتوم آملک آتا نیام اٹ زرکاری و زرگزرانی تعلقداری تے سوگو کننگ نا بابت اسہ اہم ءُ مزل نا نشان اس ئس۔ وزیراعظم داہیت آ است جمی نا درشانی ءِ کرے کہ سعودی وزیرزرکاری نا دورہ ءِ پاکستان اٹی کمکاری نا 2.8 ارب ڈالر نا ہرامفاہمتی یات داشت آتیا دستخط مس اوفتیان 8 آ کاریم بناکرینے۔ وزیراعظم عرب۔ اسلامک ملک آتا اہم سروکی دیوان نا اڈتننگ آ سعودی سرکڑدہ غاتے خراج تحسین پیش کرسا جم وجوش اٹ مہمانداری آ سعودی حکومت نا منت واری ءِہرفے۔ اوڑدہی ٹی پاکستان آن بھلو کچ اسے ٹی کسب کار افرادی قوت کن سعودی عرب اٹی روزگار نا وارخواہی تیا گپ وتران کرسا وزیراعظم پارے کہ دا بابت زوت اسہ بھلو پیش رفت اس گمانی ءِ، ہڑتوم آملک آتا نیام اٹ تین پہ تینی است خواہی نا بشخ آتیٹی گیشتر کمکاری عملی دروشم اس اختیار کننگ ءِ ہراکہ بھاز ستاکڑزک۔ اوپارےکہ اکتوبر اٹی پاک۔ سعودی بزنس فورم اٹی پاکستانی و سعودی کاروباری ادارہ غاتا نیام اٹ گپ وتران پوسکن آ زرکاری نا کسر ءِ آوار کرینے و پاکستان تون اقتصادی کمکاری ءِ گہراکرینے، خصوصی زرکاری سہولت کونسل (ایس آئی ایف سی) نا کمک اٹ مروک آ پیش رفت پاکستان اٹ درملکی زرکاری ءِ ترند کننگ اٹ اہم کڑد ادا کننگ اٹی ءِ۔ وزیراعظم سعودی سرکڑدہ غاتا وژن 2030 نا ستاءِ کرسا پاکستان نا کنڈآن اونا پبی مخ تفی نا عزم انا درشانی ءِ کرے۔ وزیراعظم پارے کہ سعودی عرب اٹی رہینگوک پاکستانی ہڑتوم آملک آتا اقتصادی شونداری ٹی اہم کڑد ادا کننگ ءِ۔ اوڑدہی ٹی نائب وزیراعظم و وزیرخارجہ اسحاق ڈار ، بنجائی وزیر حوالکاری و شینکاری عطاء اللہ تارڑ ، وزیراعظم نا خصوصی کمکار طارق فاطمی ئسک ہم ساڑی ئسر۔
