کوئٹہ۔ 11 نومبر (اے پی پی) وزیراعلیٰ میر سرفراز بگٹی نا کماشی ٹی بلوچستان صوبائی کابینہ نا دیوان دوشنبے نادے آ داڑے چیف منسٹر سیکرٹریٹ اٹی اڈ ہلک۔ دیوان نا بناء آ تدوک آ دے کوئٹہ ریلوائی اسٹیشن آ مروک آ بمب دھماکہ نا شہید آتیکن دعا کننگا۔ بلوچستان کابینہ ریلوائی اسٹیشن بمب دھماکہ نا ترندی اٹ مذمت ءِ کرسا دہشت گردی نا چٹفنگ کن پورو واک و توانائی اٹ جنگ تننگ نا عزم کرے۔ صوبائی کابینہ نا دیوان اٹی بلوچستان سیکورٹی آف وینر ایبل اسٹیبلشمنٹ ایکٹ 2024 نا منظوری ءِ تننگا۔ داایکٹ نا رداٹ بلوچستان اٹی بحالی امن کن چندی سیکورٹی ادارہ غاتا مربوط گام گیج اتے بارآور کننگک۔ بلوچستان کابینہ راڑاشم و کنگری ٹی پوسکن آپولیس اسٹیشن وخت اس کہ چمن ماسٹر پلان لیویز تھانہ نا جوڑ کننگ نا منظور ی ءِ تس، صوبائی کابینہ بلوچستان سیلز ٹیکس آن سروسز ریونیو اپیلیٹ ٹریبونل نا چیئرمین /باسک آتا تعیناتی نا ہم منظوری ءِ تس دیوان اٹی کوئٹہ ڈویلپمنٹ پیکج کن درکار فنڈ انا ہم منظوری ءِ تس۔ کابینہ دیوان آن تران کرسا وزیراعلیٰ بلوچستان میر سرفراز بگٹی پارےکہ دہشت گردی نا عفریت تون مون تننگ کن پکا عزم اٹ کاریم کننگ اُن پائیدار امن کن سیکورٹی فورس آک حکومت و الس تون اواری اٹ جنگ تننگ ءُ، امن دشمن زموار آتے پورو شکست آن دوچار کینہ نن سنبرینگوک اُن کہ دہشت گردی ءِ چٹفسا امن نا بحالی ءِ پک کینہ۔ اوپارے کہ صوبہ ٹی حسب ضرورت جوڑ کروک پوسکن آ پولیس و لیویز تھانہ غاتا جوڑ کننگ آن بحالی امن نا گام گیج آتیٹی کمک رسینگک۔ وزیراعلیٰ پارت کرے کہ سلاہ ئی پوسکن آ پولیس اسٹیشن تا دنگ انا تعین السی گرج آتون ہم گرنچ کننگے۔ میر سرفراز بگٹی پارے کہ کوئٹہ شار مچ آ صوبہ نا دروشم ءِ ہنداسوب آن صوبائی حکومت نا گچینی کن کوئٹہ ڈویلپمنٹ پیکج نا ودفنگ المی ءِ۔ شار انا شونداری و زیبائی کن درکار فنڈ آتے بلاتاخیر جاری کننگک دیوان اٹی کوئٹہ ریلوائی اسٹیشن آ بمب دھماکہ نا واقعہ غان پد ہلہلہ ئی طبی خذمت آتا فراوانی آ محکمہ جان جوڑی بلوچستان نا کارکڑد نا ستاءِ کننگا۔ وزیراعلیٰ بلوچستان روز وقوعہ صوبائی وزیر بخت محمد کاکڑ، میر شعیب نوشیروانی، حاجی علی مدد جتک، تون اوار تعلقدار کمامدار و محکمہ جان جوڑی نا غٹ ڈاکٹر و طبی عملہ نا بے لوث انسانی خذمت آتا ستاءِ کرے ، وزیراعلیٰ بلوچستان نا سلاہکار ڈاکٹر ربابہ خان بلیدی دیوان اٹی سلاہ تس کہ ہروڑنا ہلہلہ ئی و ناگہانی حالیت آتون مون تننگ کن منشاکار آتے المی تربیت ترسا اوفتا خذمت آتے دوئی کننگے تو ریلیف سرجزآتے پین گچین کننگ مریک۔ وزیراعلیٰ بلوچستان سلاہ غان امنا کرسا گچین حکمت عملی اس جوڑ کننگ نا پارت کرے دیوان اٹی صوبائی وزیر میر شعیب نوشیروانی، میر سلیم کھوسہ، میر عاصم کرد گیلو، حاجی علی مدد جتک ، نور محمد دمڑ، راحیلہ حمید خان درانی، بخت محمد کاکڑ، وزیراعلیٰ نا سلاہکار ویمن ڈویلپمنٹ ڈیپارٹمنٹ ڈاکٹر ربابہ خان بلیدی، چیف سیکرٹری بلوچستان شکیل قادر خان، پرنسپل سیکرٹری عمران زرکون، ایڈیشنل چیف سیکرٹری داخلہ شہاب الدین تون اوار چندی محکمہ غاتا سیکرٹری و تعلقدار کمامدارآک بشخ ہلکر۔
