اسلام آباد۔ 11 نومبر (اے پی پی) بنجائی وزیر داخلہ محسن نقوی سالانہ تبلیغی اجتماع نا بابت رائیونڈ نا دورہ ءِ کرے و تبلیغی جماعت نا بزرگ فاروق، ڈاکٹر ندیم اشرف، انوار غنی ، امتیاز غنی، عباداللہ و ایلوفتے تون اوڑدہی کرے۔ وزیرداخلہ محسن نقوی تون پیشن نا ملک آن بروک آ بشخ ہلوک آتون ہم اوڑدہی کرے و دین اسلام کن اوفتا خذمت آتا ستاءِ کرے۔ وزیرداخلہ محسن نقوی تبلیغی اجتماع کن شاندار بست وبند آتیا فاروق ایلم و ایلو بزرگ آتے مبارکبادی تس۔ اونا پاننگ ئس کہ تبلیغی اجتماع نا لکھ آ بشخ ہلوک آتیکن بے مٹ بست وبند آتیا نما غٹ انا کوشست آک ستاکڑزرہ۔ دین اسلام نا تبلیغ نا نیک کاریم کروک آ دنیا و آخرت اٹ سرسہب مریرہ۔ بنجائی وزیر داخلہ پارے کہ ای ہر سال باقاعدگی اٹ تبلیغی اجتماع غا بریوہ، داڑے بننگ تون روحانی سکون ملک۔ اللہ تعالیٰ تبلیغی اجتماع نا منتظمین آتے نیک کاریم ءِ برجاتخنگ نا اجرایتک۔ داوخت آفاروق ایلم امت مسلمہ نا سیوت، شروباطل نا چٹفنگ وحق و سچ انا سربلندی کن دعاکرفے۔ اوڑدہی ٹی پاکستان نا سلامتی ، شونداری ، شونہالی و امن کن ہم خصوصی دعا کننگا۔ فاروق ایلم و ایلو بزرگ آک تبلیغی اجتماع غا بننگ آ بنجائی وزیر داخلہ محسن نقوی نا منت واریءِ ہرفیر۔
