اسلام آباد۔8نومبر (اے پی پی): جامعہ مسجد ریاض الجنتہ ءُ اسلامی کمپلیکس ءِ سرپرست ءُ نامداریں ھیرواہ ڈاکٹر سہیل مجید شیخ ءَ گشتگ کہ انسانیت ءِ خدمت ءُ چاگرد ءِ پدمنتگیں طبقہ ءِ دیمروئی آئی ءِ اولی کار انت۔ اے پی پی ءَ گوں ھاسیں گپ ءُ تران ءِ تہ ءَ آئی ءَ گوشت کہ یک سیویلائزڈیں چاگردے ءِ بستار ءَ مارا یکے دومی ءِ کمک کنگ لوٹ ایت، انسانیت مارا زلورت مند آنی ھیال داری کنگ ءِ سکین ءَ دنت۔ ڈاکٹر سہیل مجید شیخ ءَ گوشت کہ گوستگیں 12 سال ءَ چہ من ءُ وتی ادارگ ایران ءُ عراق ءِ زیارت کنوکیں مردم آناں مپت ءَ دوا ءُ درمان پجاری ءِ کار ءَ گوں بندوک آں ءُ 20 ءَ چہ گیش ملک آنی مردم آناں کمک کتگ۔ پدا آئی ءَ چہ 2008 ءَ راوت ءِ یک کالجے ءَ یتیم، نزوریں زھگ ءُ شھیدانی زھگاں مفت وانگ ءُ زانگ ءِ ھاترا یک خیراتی ادارہے بندات کتگ۔ آئی ءَ گیش گوشت کہ نثار فاطمہ امین فاؤنڈیشن ءِ کمک ءَ ما مستحقیں زھگ آناں کتاب، یونیفارم، اسکول بیگ ءُ وردن ءَ ھوار سرجمیں وانگ ءُ زانگ ءِ کمک ءَ کنگ ءَ ایں ۔ آئی ءَ گیش کرتگ کہ اے کوشست آنی سبب ءَ نودربر مالی بار ءِ ھلاپ ءَ کوالٹی ءِ وانگ ءُ زانگ ءِ رسگ ءَ دل یکیمی کنگ بنت۔ ڈاکٹر سہیل مجید ءَ ورنا آنی سر ءَ زور پر دات کہ آ ازمت ءِ جذبہ ءَ را ودی بہ کن اَنت ءُ حقیقی سوبمندی یک ءُ دومی ءِ کمک ءَ انت۔ آئی ءَ گوشت کہ دومی ءِ کمک کنگ انسانیت ءِ راستیں کلوہ اِنت ایشی ءَ چہ ورنا آناں دل یکیمی ءِ گوما کار کنگ ءَ دلبڈی دنت ءُ انسانیت ءِ احترام ءَ کنت۔
