اسلام آباد۔7نومبر (اے پی پی): مزن وزیر محمد شہباز شریف 11نومبر ءَ ریاض ءَ برجم دارگ بوھوکیں دومی یکجائی عرب اسلامی سروک دیوان ءَ بہر زورگ ءِ واستہ سعودی عرب ءَ روت۔ اے گپ پنچ شمبے ءِ روچ ءَ یک پریس بریفنگ ءِ تہ ءَ درئی کارانی کارگس ءِ جارچین ممتاز زھرہ بلوچ ءَ گوشت۔ آئی ءَ گوشت کہ سروک دیوان ءَ چہ پیسر 10نومبر ءَ دری کارانی کونسل ءِ دیوان بیت، دری کارانی کونسل ءِ دیوان ءَ نائب مزن وزیر ءُ دری کارانی وزیر سینیٹر محمد اسحاق ڈار بھر زوری کنت۔ جارکش ءَ گوشت کہ سروک دیوان ءِ گوانک جنگ ءِ گامگیج سعودی عرب ءِ حکومت ءَ کتگ، ایشی ءِ تہ ءَ میاں اوستمانی تک ءِ جاور ھال آنی سر ءَ گپ ءُ تران کنگ بیت۔ اے 11نومبر 2023 ءَ ریاض ءَ برجم دارگ بوھوکیں عرب ءُ اسلامی غیر معمولی مشترکہ دیوان ءِ پد ءُ رند اِنت کہ ایشی ءِ تہ ءَ غزہ ءُ ایندگر مقبوضہ دمگ آنی جاور ھال آنی سر ءَ گپ ءُ تران کنگ بیت۔ سروکیں دیوان ءَ مملکت ءُ حکومت ءِ سروک ءُ عرب لیگ ءُ او آئی سی ءِ باسکیں ملک آنی مزنیں کارندہ آنی بھر زوری ءِ گمان اِنت۔ درئی کارانی کارگس ءِ جارکش ءَ گوشت کہ مزن وزیر سروکیں دیوان ءَ فلسطین ءِ مکسد ءِ واستہ پاکستان ءِ سرجمیں کمک ءِ یک رندے پدر کنت، آ غزہ ءَ نسل کشی ءَ را ترندی ءَ گوں ھلاسی ءِ لوٹ کنت، ترندی ءُ بے شرطیں جنگ بندی ءُ برجاھیں اسرائیل ءِ مہم ءَ را ترندی ءَ گوں ھلاسی ءِ لوٹ کنت ءِ دمگ ءَ کنگ ءِ لوٹ کنت کہ میان اُستمانی ملکانی ایمنی ءَ را ھترناک کنگ ءَ اِنت۔ آئی ءَ گوشت کہ پاکستان فلسطینی اُلس ءَ را میاں اوستمانی رکھینگ ءِ پھجارینگ ءُ 4 جون 1967ءِ سیم سر آنی سر ءَ فلسطین ءِ یک آجوئیں ریاست ءِ جوڑ کنگ ءِ واستہ ھم زور دنت کہ ایشی ءِ بنجاھی شھر القدس الشریف بہ بیت۔ جارکش ءَ گوشت کہ سروک دیوان ءِ موہ ءَ مزن وزیر ءِ نیمگ ءَ چہ عرب لیگ ءُ او آئی سی ءِ ایندگر باسکیں ملک آنی سروک آنی گوما دو نیمگی گند ءُ نند ءِ امیت انت۔
