کوئٹہ۔ 01 نومبر (اے پی پی) وزیراعلیٰ بلوچستان میر سرفراز بگٹی مستونگ اٹی دھماکہ نا مذمت ءِ کرسا پارینے کہ دہشت گرد آک نیزگار مزور آتون داسہ کودک چناتے ہم شست کریر، دا است ہسون واقعہ مذمت نا قابل ءِ۔ اوپارے کہ کودک چناو بے گناہ بندغ آتا خون نا حساب ءِ ہلینہ، شاری آبادی ٹی ہندی بندغ آتے ہم دہشت گرد آتیا نظر تخوئی مریک، اواری اٹ ہی دہشت گردی نا عفریت نا مقابلہ ءِ کننگ مریک، دہشت گرد آک سافٹ ٹارگٹ اٹی داسہ کودک چناتے شست کریر ہراکہ بے کچ مذمت نا قابل ءِ۔ وزیراعلیٰ بلوچستان شہید پولیس کارندہ و کودک چناتا وارث آتون است ہسونی نا درشانی ءِ ہم کرے۔
