اسلام آباد۔ 01 نومبر(اے پی پی) وزیراعظم محمد شہباز شریف مستونگ اٹی بمب دھماکہ نا ترند انگا لوز آتیٹی مذمت ءِ کرسا پارینے کہ دہشت گرد آتا اسکول نا چناتیا جلہو بلوچستان اٹی اوفتا تعلیم دشمنی نا شاہدی ءِ، دہشت گرد آک داوڑنا لغورجلہو آتے اٹ ننا قوم انا حوصلہ غاتے شیف شاغنگ کپسہ۔ جمعہ نادے آوزیراعظم آفس نا میڈیا ونگ انا کنڈآن جاری بیان نا رداٹ وزیراعظم دھماکہ ٹی مسہ چناواسہ پولیس کارندہ سے نا شہیدی آ ڈکھیائی و رنج انا درشانی ءِ کرینے۔ اوشہید آتا درجہ غاتا بڑزی و اوفتا خاہوت آتیکن صبر وجمیل نا دعاہم کرے۔ وزیراعظم واقعہ نا زموار آتا پیدواری ءِ کرسا اوفتے قرارواقعی سزا ترفنگ نا پارت کرے۔ وزیراعظم ٹھپی تے گچین طبی آسراتی فراوان کننگ نا پارت ہم کرے۔ وزیراعظم پارے کہ دہشت گرد آتا جلہو بلوچستان اٹی اوفتا تعلیم دشمنی نا شاہدی ءِ ، دہشت گرد آک داوڑنا لغور جلہو آتے اٹ ننا قوم انا حوصلہ غاتے شیف شاغنگ کپسہ، داوڑنا جلہو آک حکومت نا بلوچستان اٹی تعلیم و شونداری نا مون آ دننگ نا عزم ءِ متزلزل کننگ کپسہ۔ وزیراعظم داعزم انا درشانی ءِ کرے کہ دہشت گردی نا عفریت نا ملک آن پورو چٹفنگ اسکان اونا برخلاف جنگ ءِ برجاتخنہ۔ وزیراعظم پارے کہ ملک و قوم انا خاطر قربانی تروک آ پولیس نا آفیسر و ورناتیا مچ آ قوم گمرکیک۔
