وزیراعظم شہباز شریف نا ویتنام نا وزیراعظم تون اوڑدہی، واپار وزرکاری ءِ سوگو کننگ نا بابت گپ وتران

ریاض۔ 30 اکتوبر (اے پی پی) وزیراعظم محمد شہباز شریف سعودی عرب نادارالحکومت ریاض اٹی 8 می فیوچر انویسٹمنٹ انیشی ایٹیو کانفرنس نا وخت آ ویتنام نا وزیراعظم فام چن تون اوڑدہی کرے۔ چارشنبے نادے آ وزیراعظم آفس نا پریس ونگ آن جاری بیان نا رداٹ اوڑدہی ٹی ہڑتوم آ راہشونک پاکستان ویتنام ہڑتوم آ کنڈآتا تعلقداری خاص کر واپار و زرکاری ءِسوگو کننگ نا بابت گپ وتران کریر۔ وزیراعظم شہباز شریف پاکستان و ویتنام نا نیام اٹ تعلقداری تا مون آ دننگ نا بابت گپ وتران کرسا پارے کہ ہڑتوم آملک آتا نیام اٹ واپار و زرکاری ٹی کمکاری ءِ ودفنگ نا بے پناہ کچ ساڑی ءِ۔ وزیراعظم دامسخت کن ہڑتوم آملک آتا نیام اٹ واپاری و کاروباری ڈل آتا ہن و بر نا سلاہ تس۔ ہڑتوم آ راہشونک السی رابطہ غاتے سوگو کننگ و ہڑتوم آملک آتا نیام اٹ سیل و سوات ءِ مون آ دننگ کن تینا عزم انا درشانی ءِ کریر۔ وزیراعظم شہباز شریف آسیان تنظیم اٹی پاکستان نا پورو ڈائیلاگ پارٹنر مننگ نا کوشست آتا بابت ویتنام آن کمکاری نا خواست کرے۔ وزیراعظم شہباز شریف ویتنام نا وزیراعظم ءِ پاکستان نا سرکاری دورہ ءِ کننگ نا ہم سلہ خلک۔ اوڑدہی ٹی وزیر دفاع خواجہ محمدآصف  ، وزیرخزانہ محمد اورنگزیب، وزیر نجکاری عبدالعلیم خان ، وزیر پیٹرولیم ڈاکٹر مصدق ملک، وزیر واپار جام کمال خان و وزیر حوالکاری و شینکاری عطاء اللہ تارڑ ئسک ہم ساڑی ئسر۔