پاکستان اٹی سعودی عرب نا زرکاری ناکچ ودسا 2.8 ارب ڈالر و تین پہ تینی معاہدہ غاتا کچ 34 مسنے، وزیراعظم محمد شہباز شریف و سعودی وزیر زرکاری نا پریس کانفرنس

ریاض۔ 30 اکتوبر (اے پی پی) وزیراعظم محمد شہباز شریف برادر ملک سعودی عرب نا کمک اٹ پاکستان ءِ اقتصادی شونداری و شونہالی نا مزل آن ہمکنار کننگ نا عزم ظاہر کرسا پارینے کہ پاکستان اٹی سعودی عرب نا ساڑی آ زرکاری نا کچ 2.8 ارب ڈالر اسکان سرمسنے وخت اس کہ زرکاری معاہدہ غاتا کچ ودسا 34 مسنے، معاہدہ غاتیا دستخط آتا سیاہی خشک مننگ آن مست عملدرآمد نا بناستاکڑزک ءُ ہیت اسے، ہڑتوم آملک اواری اٹ شونداری نا مزل آتے طے کیرہ و ہڑتوم آکنڈآتا تعلقداری تے پین مون آ دیرہ۔ وزیراعظم داخیال آتا درشانیءِ چارشنبے نادے آ داڑے سعودی وزیرزرکاری خالد بن عبدالعزیز الفالح تون اوار اسیجائی پریس کانفرنس اٹی کرے۔ داوخت آ سعودی عرب نا شاہی دیوان نا سلاہکار محمد بن التویجری آن بیدس بنجائی وزیر حوالکاری و شینکاری عطاء اللہ تارڑ و پاکستانی ڈل انا ایلو باسک آک ہم ساڑی ئسر۔ وزیراعظم پارے کہ فیوچر انویسٹمنٹ انیشی ایٹیو نا اڈتننگ آن سعودی ولی عہد شہزادہ محمد بن سلمان نا مدبرانہ سوچ انا عکاسی مننگ اٹی ءِ، سمٹ اٹی اواری آ ننے بھاز خوشی مسنے، داوخت آسعودی ولی عہد و وزیراعظم شہزادہ محمد بن سلمان تون اہم و فائدہ اوڑدہی مس، دااوڑدہی آن سعودی ولی عہد نا پاکستان و پاکستانی الس تون گہری تعلقداری نا عزم انا درشانی مسنے۔ وزیراعظم پارے کہ او آئی ایم ایف تون پروگرام  ءِ گڈیکو دروشم اس تننگ اٹ کمک فراوان کننگ آ سعودی عرب نا منت واری ءِ ہرفے ، اومیت ءِ کہ دا آئی ایم ایف تون پاکستان نا آخیریکو پروگرام مریک۔ انشاء اللہ اوکان پد نن سخت خواری، کوشست و برادر ملک سعودی عرب نا کمک اٹ پاکستان ءِ اقتصادی شونداری و شونہالی نا مزل آتا کنڈآ ہِننگ اٹ سرسہب مرینہ۔ وزیراعظم پارے کہ داہیت ستاکڑزک کہ اینو و پگہ نا اوڑدہی تیٹی اسلام آباد اٹی طے مروک معاہدہ غاتیان بیدس پین معاہدہ غاتیا امنائی مسنے، داہیت ہم ستاکڑزک کہ گڑاس معاہدہ غاتیا دستخط آتا سیاہی خشک مننگ آ ن مست اوفتیا عملدرآمد بناکرینے ہرا بھلو خبر اسے و بروک آ دے تیٹی دا معاہدہ غاتیا عملدرآمد اٹی پیش رفت مریک۔ وزیراعظم پارے کہ او بروک آ تُو انا نیام اٹی دُوارہ تینا اُراغا بریک، دادورہ غان مست نن دا معاہدہ غاتیا بھاز کاریم کروئی ءِ ہرا ہڑتوم آ ملک آتا الس نا فائدہ ٹی ءُ۔ اونا پاننگ ئس کہ سعودی عرب نا عظیم ٹیم اتون اواری اٹ نن معاہدہ غاتا نظام الاوقات آ عملدرآمد اٹی سرسہب مرینہ، کنے اومیت ءِ کہ بروک آ وار ہراتم کہ سعودی عرب آ بریوہ تو ہڑتوم آ ملک آتا الس کن پین جوان انگا خبر آتون بریوہ۔ وزیراعظم پارے کہ پاکستان و سعودی عرب اواری اٹ مون آکارہ و یکجامرسا ہڑتوم آکنڈآتا تعلقداری تے مون آ دیرہ۔ برادر عزیز ولی عہد و وزیراعظم شہزادہ محمد بن سلمان نا مدبرانہ کماشی ٹی نئے بیر ہ پاکستان بلکن مسلم امہ نا الس کن گام گیج آک برجاسلرہ۔ وزیراعظم پارے کہ 25 لکھ پاکستانی تا مہمانداری آ نن سعودی عرب نا منت وارا ُن، داپاکستانی سعودی عرب نا شونداری و شونہالی ٹی تینا کڑد ءِ ادا کننگ ءُ۔ وزیراعظم پاکستان و سعودی عرب نا الس ءِ اسہ خاہوت اسے آنبار گوندسا پارےکہ ننا کوشست ءِ کہ سعودی عرب نا گرج آتا رداٹ کسب کار افرادی قوت تیار کننگ ناقابل مرین، ہراڑآن نئے بیرہ سعودی عرب نا شونداری پروگرام ءِ مون آدننگ اٹ کمک رسینگک بلکن شونداری و شونہالی ٹی ہم تینا بشخ ءِ ہم ادا کننگ نا قابل مرینہ۔ سعودی عرب نا وزیر زرکاری خالد بن عبدالعزیز الفالح پارے کہ وزیراعظم محمد شہباز شریف نا مہمانداری آ ننے خوشی مسنے۔ وزیراعظم درو ولی عہد شہزادہ محمد بن سلمان تون اوڑدہی آن بیدس سُوارہ ٹی ہم بشخ ہلک، پاکستانی وزیراعظم فیوچر انویسٹمنٹ انیشی ایٹیو آن اہم تران کرے و مچ آ دنیا غان بروک زرکار و بزنس لیڈر آتے تینا خیال آتیٹی شریک کرے۔ اوپارے کہ چارشنبے نادے آ محمد التویجری نا کماشی ٹی  پاکستان تون ورکنگ کہول آ میٹنگ مس ہراٹی پاکستان و سعودی عرب نا نیام اٹ تعلقداری ہرا مہالو آن بڑز ءُ ءِ پین پوسکن آبڑزی تسکان سرکننگ نا بابت امور آتیا گپ وتران مس۔ گپ وتران اٹی زرگزران ، واپار، زرکاری و السی رابطہ غاتے مون آ دننگ آ گپ وتران کننگا۔ سعودی عرب لکھ آپاکستانی تا اُرا ءِ۔ اوپارےکہ 3 ہفتہ مست سعودی زرکاری ڈل پاکستان نا دورہ ءِ کرے ، پاکستان نا سرکڑدہ جم وجوش اٹ بخیرکریر و ننا جوان مہمانداری ءِ کریر۔ اوپارے کہ وزیراعظم محمد شہباز شریف و سعودی ولی عہد شہزادہ محمد بن سلمان نا کماشی و وژن  ءِ مو ن آ تخسا نن ترندی اٹ پیش رفت کننگ اُن، دورہ ءِ پاکستان اٹی 2.2 ارب ڈالر مالیت نا 27 معاہدہ غاتیا دستخط مسوسس ہرابیرہ اسہ بنااسے۔ اوپارے کہ گپ وتران آن پد ددامعاہدہ غاتا کچ 27 آن ودسا34 مسنے وخت اس کہ دانا کچ اٹی 2.8 ارب ڈالر اسکان سرمسنے۔ اوپارے کہ 5 معاہدہ غاتیا عملدرآمد  بناکرینے، پاکستان آن کشت وکشار نا بابت برآمدات ہم بناکرینے، پین 5 معاہدہ غاتیا عملدرآمد نا بابت پڑو تعلقدار کمپنیک کیرہ۔ اونا پاننگ ئس کہ اول کشت وکشار، توانائی ومینوفیکچرنگ نا بابت معاہدہ مسوسس ، جان جوڑی نا بشخ اٹی ہم  پاکستان تون کمکاری برجاءِ و پاکستان اٹ سعودی عرب نا سفیر دا بابت تینا کڑد ءِ ادا کننگ اٹی ءِ۔ سعودی وزیر زرکاری پارے کہ سعودی عرب اٹی پاکستانی ورکرآتا کچ اٹی ودکی کننگک ہراڑآن پاکستان ءِ زرراہی تس اٹی ودکی مریک۔ بروک آ منہ ہفتہ غاتیٹی پاکستان آن 300 طبی افرادی قوت سعودی عرب آبریک۔اوپارے کہ مصنوعی ذہانت و عالمگیر ڈیجیٹل اسپیس نا بابت مچ آ دنیا نا خنک سعودی عرب آٹی ءُ نن تینا ڈیجیٹل اسپیس اٹی پاکستانی کمپنی تا اواری نا خواہندار اُن۔ ننے اومیت ءِ کہ وزیراعظم پاکستان نا دورہ و اونا وژن و اصلاحات و سعودی ولی عہد نا پارت نا رداٹ پاکستان داوارخواہی تیان پبی فائدہ ہرفک۔ اوپارے کہ ولی عہد شہزادہ محمد بن سلمان پاکستان ءِ اولیتی حیثیت تسنے و پاکستان تون پدریسہ رابطہ کن او محمد التویجری ءِ زمواری تسنے۔ سعودی عرب ناٹیم انا پاکستان نا ٹیم و خصوصی زرکاری سہولت کونسل تون رابطہ استوار ءِ۔ اوپارے کہ سعودی وزارت زرکاری ٹی ہم اسہ ٹیم اس جوڑ کننگانے ہرا پاکستان اٹ سعودی عرب نا سفیر تون رابطہ ٹی ءِ۔