پاکستان و سعودی عرب نا نیام اٹ زرکاری، واپاری معاہدہ و ایم او یو تا مثبت نتیجہ مون آ بننگ بناکرینے، وزیراعظم محمد شہباز شریف

ریاض۔ 30 اکتوبر (اے پی پی) وزیراعظم محمد شہباز شریف پارینے کہ پاکستان  وسعودی عرب نا نیام اٹ زرکاری، واپاری معاہدہ و ایم او یو تا مثبت نتیجہ مو ن آ بننگ بناکرینے۔ پاک۔ سعودی سوگو اقتصادی شریداری ءِ مون آ دننگ کن پوسکن ءُ وارخواہی ودی کننگ نا گرج ءِ۔ وزیراعظم آفس  نا میڈیا ونگ آن جاری بیان نا رداٹ وزیراعظم داخیال آتا درشانی ءِ سعودی وزیر زرکاری انجینئر خالد بن عبدالعزیز الفالح و سعودی شاہی دیوان نا سلاہکار محمد بن مزید التویجری تون اوڑدہی ٹی گپ وتران کرساکرے۔ اوڑدہی ٹی وزیردفاع خواجہ محمد آصف ، وزیر خزانہ محمد اورنگزیب ، وزیر نجکاری عبدالعلیم خان، وزیر پیٹرولیم ڈاکٹر مصدق ملک، وزیر واپار جام کمال خان و وزیر حوالکاری و شینکاری عطاء اللہ تارڑ ئسک ہم ساڑی ئسر۔ اوڑدہی ٹی پاکستان و سعودی عرب  نا نیام اٹ چندی اقتصادی گام گیج آتیا مروک آ پیش رفت نا جاچ ءِ ہلنگا۔ سعودی وزیرزرکاری نا 9آن 11 اکتوبر آ نجی بشخ انا اسہ بھلو ڈل اسے تون پاکستان نا ساڑی آ دورہ نا ذکرءِ کرسا وزیر اعظم پارے کہ دورہ ٹی پاکستان اٹ دستخط کروک مفاہمتی یات داشت آتے پبی زرکاری و واپاری معاہدہ غاتا دروشم اٹی مثبت نتیجہ غاتا مون آ بننگ بناکرینے۔ وزیراعظم پاک۔ سعودی سوگو اقتصادی شریداری ءِ مون آدننگ کن پوسکن ءُ وارخواہی ودی کننگ نا رفتار ءِ برجاتخنگ آ ہم گپ وتران کرے۔ وزیراعظم شہباز شریف پاکستان تون سوگو اقتصادی کمکاری نا کوشست و عزم آ سعودی وزیرخالد الفالح نا منت واری ءِ ہرفے۔ اوسعودی عرب نا وژن 2030نا پس منظر اٹی ہڑتوم آملک آتیکن ساڑی اقتصادی وارخواہی تیان فائدہ ہرفنگ نا گرج آ زور شاغا۔