وزیراعلیٰ بلوچستان میر سرفراز بگٹی نا کماشی ٹی ٹیکسٹ بک بورڈ انا کارکڑد نا بابت جاچ دیوان

کوئٹہ۔ 30 اکتوبر (اے پی پی) وزیراعلیٰ بلوچستان میر سرفراز بگٹی نا کماشی ٹی ٹیکسٹ بک بورڈ انا کارکڑد نا بابت جاچ دیوان چارشنبے نادے آ داڑے چیف منسٹر سیکرٹریٹ اٹی اڈ ہلک۔ دیوان اٹی صوبائی وزیر تعلیم راحیلہ حمید خان درانی، پرنسپل سیکرٹری ٹو چیف منسٹر عمران زرکون، سیکرٹری ایجوکیشن محمدصالح ناصر ، ایڈیشنل سیکرٹری چیف منسٹر سیکرٹریٹ محمد فریدون، چیئرمین بلوچستان ٹیکسٹ بک بورڈ گلاب خان خلجی تون اوار ایلو تعلقدار کمامدار آک بشخ ہلکر۔ دیوان ءِ پاننگاکہ بلوچستان اٹی درسی نصاب ءِ قومی نصاب تون ہم گرنچ کننگ انگءِ و پوسکن چھاپ مروک آ کتاب آتیٹی ہر پنہ غا سکیننگ بارکوڈ ہم نوشتہ کننگ انگ ءِ تانکہ استاد آک ہروڑنا راہشونی کن آن لائن پورٹل تون رجوع کننگ کیر۔ دیوان ءِ معلومدار کننگا پوسکن آ سال اکن سرکاری درسی کتاب برجاسال دسمبر اسکان چھاپ مرسا پورو مریرہ، داسال ساف شفاف ملک گیر پیشکش آتا طلبی نا کمک اٹ کتاب آتا اشاعت نا کاریم پت انا قابل فرم آتے تننگانے ہراڑآن بروک آ سال نئے بیرہ 75 کروڑ روپئی نا براہ راست بچت مریک بلکن ایلو خڑچ آتے اوار کرسا جم وڑاٹ دا بچت  اسہ ارب روپئی نا مریک، بلوچستان ٹیکسٹ بک بورڈ اٹی ریسرچ اینڈ ڈویلپمنٹ ونگ اس جوڑ کننگانے ہرا پدریسہ پٹ وپولی امور آ نظر تخک۔ میر سرفراز بگٹی بلوچستان ٹیکسٹ بک بورڈ انا کارکڑد آ است جمی نا درشانی ءِ کرسا محکمہ تعلیم نا کمامدارآتے پارت کرے کہ سرکاری کتاب آتا اسکول آتیٹی وخت آ فراوانی ءِ پک کننگے۔ وزیراعلیٰ پارے کہ بلوچستان نا چناتے پوسکن آپٹ وپول آ تالان نصاب خوانفنگے، ننے بلوچستان نا چناتے دا لائخ کروئی ءِ کہ او اسلام آباد و لاہور نا طالب علم آتا مقابلہ ءِ کننگ کیر، جوان انگا آفیسر آتا است بڈی ءِ کننگک و اوفتا تعیناتی نا دورانیہ ءِ رکھ تننگک آفیسر آک بلیک میلنگ اٹی بفس و مثبت اصلاحات نا تسلسل ءِ برقرارتخر، اوپارے کہ داہیت خوشی نا سوب ءِ کہ بلوچستان ٹیکسٹ بک بورڈ انا گام گیج آتاپنجاب ٹیکسٹ بک بورڈ ستاءِ کرسا تینا کننگ نا درشانی ءِ کرینے ننا ساڑی آ صوبائی حکومت نا تعلیمی اصلاحات آتا ایلو صوبہ غاتیٹی ستاو تینا کننگ انگ ءِ۔ دااسہ پوسکن ءُ تاریخ اسے۔ دیوان نا ایسر آ وزیراعلیٰ بلوچستان بڑزکو کارکڑد آ چیئرمین بلوچستان ٹیکسٹ بک بورڈ گلاب خان خلجی ءِ حسن کارکڑد نا سرٹیفکیٹ اس ہم تس۔