پاکستان و سعودی عرب اواری اٹ شونداری و شونہالی نا مزل آتے طے کیرہ، وزیراعظم محمد شہباز شریف

ریاض۔30 اکتوبر (اے پی پی) وزیراعظم محمد شہباز شریف پارینے کہ پاکستان و سعودی عرب اواری اٹ شونداری و شونہالی نامزل آتے طے کیرہ، معاہدہ غاتا سیاہی خشک مننگ آن مست اوفتیا عملدرآمد ستاکڑزک۔وزیراعظم داخیال آتا درشانیءِ چارشنبے نادےآ داڑے سعودی وزیر زرکاری خالد بن عبدالعزیز الفالح تون اوار اسیجائی پریس کانفرنس اٹی پارے۔ داوخت آ سعودی عرب نا شاہی دیوان نا سلاہکار محمد بن التویجری ہم ساڑی ئس۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی پاکستان اٹ پیشن نا زرکاری ٹی ودکی نا چرجوئی برجاءِ۔ تینا ساڑی آ دورہ  ءِ سعودی عرب اٹی وزیراعظم نا خصوصی کوشست آتیان سعودی عرب نا کنڈآن پاکستان اٹی پین 600 ملین ڈالر نا زرکاری نا معاہدہ غاتیا اتفاق طے مسنے۔ داکان مست سعودی عرب نا زرکاری ڈل انا اکتوبر 2024اٹی دورہ ءِ پاکستان اٹی 2.2ارب ڈالر نا مفاہمتی یات داشت  ومعاہدہ غاتیا دستخط مسنے۔ وزیراعظم نا ساڑی آ دورہ ءِ سعودی عرب اٹی 600 ملین ڈالر نا ودکی آن جم وڑاٹ پاکستان اٹ ساڑی آ سعودی زرکاری نا کچ 2.8 ارب ڈالر مسنے وخت اس کہ سعودی عرب نا پاکستان اٹ زرکاری کن دستخط مروک مفاہمتی یات داشت ومعاہدہ غاتا کچ 27 آن ودسا 34 مسنے۔ سعودیہ پاکستان زرکاری ڈٹ آتیان 5 ڈٹ آتیاکاریم بناکرسا ترندی اٹ پوروی نا کنڈآ ہِننگ ءِ۔ وزیراعظم نا دورہ ٹی ہڑتوم آملک آتا نیام اٹ تعلقداری تے پین مون آ دننگ و زرکاری ٹی ودکی آہم گپ وتران مس۔ وزیراعظم نا کنڈآن سعودیہ ٹی رہینگوک پاکستانی تا آسودہی کن ہم سعودی حکومت تون گپ وتران ہم کننگا۔