اسلام آباد۔ 29 اکتوبر (اے پی پی) بنجائی وزیر مواصلات و نجکاری عبدالعلیم خان پاکستان پوسٹل سروس نا کارکڑد و مالیاتی ڈسپلن آ گڑتی نا درشانی ءِ کرسا پارینے کہ پاکستان پوسٹ ءِ بچفنگ کن دے ونن خواری کروئی مریک، بے گرج خڑچ آتے کم کرسا سرکاری ادارہ غاتے خودانحصار کننگ ءِ۔ داخیال آتا درشانی ءِ او سے شنبے نادے آ فوکل گروپ آف کمیونیکیشن دیوان نا کماشی ءِ کرساکرے۔ دیوان اٹی بنجائی وزیر پاکستان پوسٹل سروس نا کارکڑد و مالیاتی ڈسپلن آ گڑتی نا درشانی ءِ کرے و اسہ ہفتہ ٹی پوسٹل سروس کن ہلہلہ ئی بنداو تیا مالیاتی پلان اس ترتیب تننگ نا پارت کرے۔ اوپارت کرے کہ ادارہ نا خورک آسامی ختم، ریونیو ٹی ودکی کن پبی سلاہ تسم سست روی ءِ ہلسا دے و نن خواری کروئی مریک۔ عبدالعلیم خان گپ وتران کرساپارےکہ ہراادارہ نا خڑچ آک زیات و کٹیا کم مریک او چلینگ انگ کپک، حکومتی فنڈآ سیبو کننگ نا جاگہ غا تینا وسیلہ غاتے تینٹ ودی کروئی مریک۔ فنڈ آتیٹی ودی کن مچ آملک اٹی جی پی اوز ، ڈاکخانہ غاتیٹی نادرا و پاسپورٹ کاؤنٹر جوڑکیر۔ بنجائی وزیرپارے کہ بے گرج خڑچ آتے کم کرسا سرکاری ادارہ غاتے خود انحصار کننگ ءِ، اگہ پاکستان پوسٹ ءِ بچفنگ خوارے تو آفیسر آتے سخت خواری کروئی مریک، ڈاکخانہ نا روایتی نظام بدل مسنے، داسہ پوسکن آ خواست آتا رداٹ ہی کاریم کروئی مریک۔ عبدالعلیم خان ٹاسک ترسا پارے کہ پاکستان پوسٹ اکن مربوط پالیسی اس جوڑ کیر۔ اوپارےکہ بنجائی سیکرٹری مواصلات اسہ ہفتہ ٹی سرجم رپورٹ پیش کے، مالیاتی ہدف آتے دوئی کروئی مریک۔ چندی امور تیا غور و سینئر آفیسر آتا حوال و سلا ہ پیش کریر۔
