وزیراعظم شہباز شریف سعودی عرب نا اِرادے ئی سرکاری دورہ غا ریاض آ روانہ

اسلام آباد۔ 29 اکتوبر (اے پی پی) وزیراعظم محمد شہباز شریف سعودی عرب نا اِرادے ئی  سرکاری دورہ غا اسلام آباد آن ریاض آ روانہ مس۔ وزیراعظم ریاض اٹی 29 آن 31 اکتوبر آ اڈ ہلوک آ ہشت می فیوچر انویسٹمنٹ انیشی ایٹیو اٹی بشخ ہلیک ۔ سے شنبے نادے آ وزیراعظم آفس نا پریس ونگ آن جاری کروک بیان نا رداٹ ’’لامحدود آفاق: بروک آ آخبت نا جوڑ کننگ کن اینو زرکاری ‘‘ نا سرحال آ اڈہلوک ہشت می فیوچر انویسٹمنٹ انیشی ایٹیو اٹی پاکستان تون اوار مچ آ دنیا غان ملک آک بشخ ہلیرہ۔ شریک ملک آک تینا زرگزران نا خصوصیت آتے مون آتخسا زرکاری نا مون آدننگ و پائیدار آخبت کن سلابتی عمل نا بشخ مریک۔ فیوچر انویسٹمنٹ انیشی ایٹیو کانفرنس اٹی مصنوعی ذہانت، روبوٹکس، تعلیم، توانائی، خلا، جان جوڑی و پائیدار شونداری نا بابت دنیا ءِ مون تروک ویل آتا ایسری نا بابت گپ وتران و سلابت مریک۔ تینا اِرادے ئی دورہ ءِ سعودی عرب اٹی وزیراعظم نا سعودی بڑزکو سرکڑدہ غاتون اوڑدہی ہم مریک۔ وزیراعظم شہباز شریف نا سعودی ولی عہد شہزادہ محمد بن سلمان تون ہم اوڑدہی گمانی ءِ۔ دااوڑدہی تیٹی پاکستان وسعودی عرب نا نیام اٹ ساڑی ہڑتوم آکنڈآتا تعلقداری خاص کر واپار، توانائی، معدنیات، کشت وکشار و دفاع نا بشخ آتیٹی کمکاری ءِ ودفنگ آ گپ وتران مریک۔ وزیراعظم نا ہشت می فیوچر انویسٹمنٹ انیشی ایٹیو اٹی بشخ ہلنگ آ بروک آ جہانی راہشون آتون ہم اوڑدہی گمانی ءِ۔ وزیردفاع خواجہ محمد آصف ، وزیرخزانہ محمد اورنگزیب، وزیرنجکاری عبدالعلیم خان، وزیر پیٹرولیم ڈاکٹر مصدق ملک ، وزیر واپار جام کمال خان و وزیر حوالکاری و شینکاری عطاء اللہ تارڑ ئسک ہم وزیراعظم تون اوار ئسر۔