روسی بڑزکو سرکڑدہ غاتا ساڑی آ دورہ غاتیان پاکستان و روس انا نیام اٹ تعلقداری ٹی پین سوگوی   و استحکام ستاکڑزک، وزیراعظم محمد شہباز شریف

اسلام آباد۔ 29 اکتوبر (اے پی پی) وزیراعظم محمد شہباز شریف پارینے کہ روسی بڑزکو سرکڑدہ غاتا ساڑی آ دورہ غاتا سوب آن پاکستان و روس انا نیام اٹ تعلقداری ٹی پین سوگوی و استحکام ستاکڑزک، ہڑتوم آملک آتا نیام اٹ چندی بشخ آتیٹی کمکاری نا گیشتر کچ ساڑی ءِ ہراڑآن فائدہ دوئی کرسا ہڑتوم آملک آتا الس نا شونداری نا ہدف آتے دوئی کننگ مریک۔ سے شنبےنادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف داخیال آتا درشانی ءِ روسی فیڈریشن نا فیڈریشن کونسل نا اسپیکر ویلنٹنینا میتویآنکو تون گپ وتران اٹی کرے، ہرا ڈل اتون اوار وزیراعظم تون اوڑدہی کرے ۔ وزیراعظم روسی ڈل انا دورہ ءِ پاکستان نا ستاءِ کرے و اودے ہڑتوم آ ملک آتا نیام اٹ پارلیمانی تعلقداری نا سوگوی نا کنڈآ اہم ءُ گام اس گوندا۔ اوپارے کہ روسی بڑزکو سرکڑدہ غاتا ساڑی آ دورہ غاتا سوب آن پاکستان و روس انا نیام اٹ تعلقداری تیٹی پین سوگوی و استحکام ستاکڑزک۔اوپارے کہ روس و پاکستان نا نیام اٹ چندی بشخ آتیٹی کمکاری نا گیشتر کچ ساڑی ءِ ہراڑآن فائدہ دوئی کرسا ہڑتوم آملک آتا الس نا شونداری نا ہدف آتے دوئی کننگ مریک۔ وزیراعظم پارے کہ دسمبر 2024اٹی اڈ ہلوک آ پاکستان و روس اسیجائی کمیشن نا دیوان ہڑتوم آملک آتا نیام اٹ کمکاری ءِ ودفنگ نا اہم ءُ موقع اس پک مریک۔ اوڑدہی ٹی ہڑتوم آملک آتا نیام اٹ واپار و زرکاری نا مون آ دننگ کن بینکنگ چینل آتا سوگوی و پاکستان و روس انا نیام اٹ زرگزران، واپار و زرکاری نا اسہ جوان ءُ روڈ میپ اسے نا ٹہیفنگ آ ہم گپ وتران مس۔ وزیراعظم برجاتُو انا بناٹی وزیرمواصلات نا کماشی ٹی 70 باسکی پاکستانی کاروباری شخصیت آتا ڈل انا دورہ ءِ روس و پاکستان۔ روس ٹریڈ اینڈ انویسٹمنٹ فورم اٹی بشخ ہلنگ ءِ تین پہ تینی واپار و زرکاری نا مون آدننگ کن ستاکڑزوک گوندا۔ اوروسی صدر ولادیمیر پیوٹن کن نیک است خواہی تون اوار اوار اودے زوت دورہ ءِ پاکستان نا سلہ نا کلہو ءِ تس۔